Cristina Pato fai parte de dous proxectos nominados para esta 59 edición dos premios Grammy. Un deles, Silk Road Ensemble, que opta ao mellor álbum de ‘world music’ por ‘Sing me home’; o outro, o filme documental The Music of Strangers, dirixido por Morgan Neville, candidato ao Grammy ao mellor filme musical.
A gaiteira ourensá fai parte de Yo-Yo Ma e o Silk Road Ensemble. No disco ‘Sing Me Home’ inclúe unha nova versión de ‘Cabaliño’, canción tradicional galega que foi gravada xunto cos músicos galegos e membros do ‘Rústica’ (proxecto no que tamén participou Cristina Pato) Davide Salvado, Anxo Pintos e Roberto Comesaña.
O album foi desenvolvido e gravado en paralelo a The Music of Strangers: Yo-Yo Ma and the Silk Road Ensemble, o documental do director gañador dun Oscar e un Emmy Morgan Neville que narra a historia do Silkroad, que se estreou en xuño nos cinemas de todo o mundo. O filme conta a historia deste colectivo musical creado polo cellista Yo-Yo Ma. Pódese seguir a través deste traballo as vidas deste grupo de instrumentistas. A parte adicada á gaiteira ourensá explora os valores fundamentais da cultura e da identidade galega e lévanos a coñecer a súa vida familiar, social e cultural en Galiza.
