Gabriel Tizón, premio “Fotografía do ano” en Portugal

En “O mapa dos refuxiados”, Tizón presenta unha fotografía que tirou o novembro pasado no campo de refuxiados de Moria, en Lesbos. Nela vese un mapa transparente de Europa e unha muller que "toca" Alemaña. O fotógrafo galego tamén recibiu o primeiro premio no apartado de Deportes e o premio de honra no apartado de Vida Cotiá.

A reportaxe “Talibés, Escravos dos Tempos Modernos”, do fotoxornalista portugués Mário Cruz foi o gran vencedor do Prémio Estação Imagen 2016. No traballo retrata o tráfico e a explotación infantil no Senegal.

Este certame é o máis importante de Portugal arredor da fotografía social. Formaron parte do xurado Joao Silva (fotógrafo do New York Times e cofundador do Bang Bang Club), Aindan Sullivan (vicepresidente do Servizo fotográfico de Getty Images e presidente do xurado World Press Photo 2012), Cheryl Newman (directora de fotografía da revista Telegraph Magazine) e Laurent Rebours (Director de fotografía de Associated Press para Francia e Norte de África).

A praza do Obradoiro de Santiago acolle durante todo o mes de abril a exposición de Tizón “Refuxiados sen camiños”, na que reflicte a vida dos refuxiados de diferentes países.