Fíos que nos permiten seguir tecendo o mundo

A galería de arte contemporánea Trinta de Santiago de Compostela hospeda até o 28 de marzo a produción artística que o pintor e profesor de Belas Artes na Universidade de Granada José María Fernández Freixanes (Pontevedra, 1953) elaborou entre os anos 2020 e 2023. Unha obra que o comisario, Xosé Luís García Canido, definiu como "ese fío condutor que nos permite seguir tecendo e descifrando o tapiz do mundo". O título da exposición, Fíos, é claramente unha pista da técnica artística que Freixanes utilizou para elaborar estes cadros: retallos de teas de diferentes cores cosidos puntada a puntada polo propio artista. Unhas pasadas de agulla sobre as que se esbozan, polo xeral, figuras femininas de diferentes idades e de diferentes culturas, como mostra dos diferentes mundos dos que bebe o autor: o galego, pola súas orixes, e o oriental, ao que o artista pontevedrés sempre estivo vencellado. Sobre o porqué da escolla do título da mostra, José Freixanes explica, en conversa con Nós Diario, que "é unha referencia técnica e tamén metafórica ao feito de fiar, de ter que traballar coa idea do cosido. Ten que ver co 'cosido' da vida". 'Miradas', 'Anacos' e 'Labirinto' son as tres obras que conforman a exposición 'Fíos' do pintor José Freixanes Precisamente, un dos motivos recorrentes nos cadros expostos no local da rúa Virxe da Cerca é a silueta do característico labirinto dos petróglifos de Mogor, en Marín (comarca do Morrazo). A este respecto, Freixanes salienta que "o labirinto de Mogor tamén é o labirinto da vida". "Teño este labirinto mesturado na cabeza desde que era novo", engade. Precisamente, Fíos está composta por tres obras: Miradas, Anacos e Labirintos. Travesía pola pandemia Fíos recolle a creación artística de Freixanes durante os tres últimos anos, incluíndo o período afectado pola pandemia da Covid-19. Unha época que supuxo, para algunhas e algúns artistas, unha explosión de creatividade. Para outros, o confinamento provocado pola expansión do coronavirus trouxo unha parálise nos seus traballos. A arte do futuro asoma no Marco de Vigo Freixanes sitúase "claramente nos dous". "Vivimos unha situación case 'extraterrestre'. Iso influenciounos a todos. Por outra parte, no meu caso, cando me atopei confinado, non quedou máis remedio que pasar 24 horas nun estudo. Isto deu lugar a unha realidade que está plasmada nas obras de Fíos", expón Freixanes a Nós Diario. 'Bueno Carallo Bueno' A inauguración desta exposición de José Freixanes decorreu o pasado 16 de febreiro. Durante a mesma tivo lugar a presentación do libro Bueno Carallo Bueno, un poemario con textos do xornalista e escritor Alberto Avendaño e imaxes de Freixanes. Unha obra que "estabelece un diálogo artístico, lúdico e sentimental coa exposición". Aínda que Bueno Carallo Bueno está tanto en galego como en castelán, Freixanes explica que "son dous libros, en realidade. Non é unha tradución dunha lingua á outra. Os dous manteñen a súa independencia e están dentro dese concepto de atar para poder sobrevivir. O concepto xeral do libro, e tamén o da exposición, é a idea de que 'despois da Apocalipse hai que seguir vivindo'". O futuro da creación galega Freixanes estivo vinculado, xunto con outros artistas como Menchu Lamas e Berta Álvarez Cáccamo, ao Grupo Atlántica, unha agrupación artística galega creada en 1980 co propósito de reactivar as artes plásticas na Galiza após a ditadura de Francisco Franco. Atlántica tiña como obxectivo modernizar a plástica galega, sen deixar de entroncala nuns sinais de identidade propios próximos a propostas políticas progresistas e galeguistas. Un novo libro recupera a obra de Berta Cáccamo Os traballos de Atlántica poderían encadrarse dentro doutras propostas de tipo internacionalista, sendo os seus integrantes, en certa medida, herdeiros dos coetáneos da transvangarda italiana. "Atlántica foi unha iniciativa que tivo que ver coa famosa 'Movida Viguesa'. Foi coetánea do nacemento de Siniestro Total e Os Resentidos. En xeral, vivimos acontecementos que para nós eran pequenos, pero que hoxe en día se antollan xigantescos. O grupo foi necesario como movemento, con todos os seus defectos", explica o pintor. "Agora hai artistas galegas de tremendo interese e son elas as que teñen que xerar o futuro, un futuro que creo que é prometedor", engade José Freixanes. O Grupo Atlántica tivo unha curta vida no panorama artístico, pois disolveuse tres anos despois da súa creación, en 1983. Porén as súas exposicións en Baiona (Vigo), Santiago de Compostela e Madrid servíronlle a Freixanes para darse a coñecer como un dos máis claros exemplos da vangarda plástica da Galiza. Freixanes, unha vida de arte Xosé María Fernández Freixanes estivo vencellado ao mundo da arte desde moi novo. Fórmase na Facultade de Belas Artes de Bilbao (Euskal Herria) e posteriormente na de Madrid. Antes do seu paso polo Grupo Atlántica, realiza numerosas viaxes por Europa, África e a India, unhas vivencias que marcan claramente a súa obra. Actualmente, é profesor na Facultade de Belas Artes da Universidade de Granada (Andalucía).