venres 05.06.2020

O festival O Son do Camiño provoca “prezos desorbitados” en Compostela

O Son do Camiño, cuxa segunda edición decorre esta fin de semana no Monte do Gozo de Compostela, atraerá, sempre segundo a organización, milleiros de persoas á cidade. Trinta e tres mil serán as que asistan ás tres xornadas de concertos. Entre as súas consecuencias, unha “desorbitada” escalada de prezos na hostalaría.

Imaxe do público do Son do Camiño do pasado ano. Foto: cedida.
Imaxe do público do Son do Camiño do pasado ano. Foto: cedida.

Así o avisa a Asociación Hostelería Compostela a través da súa presidenta Sara Santos en declaracións a Europa Press. A agrupación tamén manexa datos sobre a ocupación hosteleira nestes días: un 95%. O festival de música é, así, un factor de promoción turística, que a Xunta, polémica promotora do mesmo, quere relacionar a toda costa co Camiño de Santiago.

O proceso de adxudicación en 2018 á unión temporal (UTE) de Esmerarte e Old Navy pola enorme cifra de tres millóns de euros recibiu duras críticas de partidos políticos e asociacións profesionais do sector. Nesta segunda convocatoria as redes fixéronse eco dunha iniciativa relacionada co mesmo: o programa Son Voluntario/a.

Son Voluntario/a depende da Dirección Xeral de Xuventude do Goberno galego e supón 36 prazas para que “mozas e mozos realicen diferentes tarefas e vivan a experiencia do festival desde dentro”. As “tarefas” descríbeas o comunicado oficial como “ofrecer información de interese sobre os servizos que ofrece este evento musical, facilitar a circulación das persoas dentro do recinto e realizar, de ser o caso, actividades de sensibilización medioambiental”.

Estas persoas voluntarias traballarán en quendas de tres horas e a cambio do seu labor obterán “un bono de acceso a O Son do Camiño facilitado polos organizadores” e un “certificado de experiencias voluntarias expedido pola Dirección Xeral”.

Eclecticismo comercial no cartaz

O cartaz artístico do Son do Camiño caracterizouse xa na primeira edición por certo eclecticismo estilístico, preocupación máis comercial que artística, a contratación de nomes internacionais que non atravesan o seu período de maior repercusión, e presenza galega na letra pequena da oferta. Este 2019 hai sobre todo unha excepción: a de Rosalía, a música estatal con maior eco internacional do momento.

Na cabeceira do festival están ademais Iggy Pop, Black Eyed Peas, Bloc Party, David Guetta, Die Antwoord e Richard Ashcroft. Galegos son, entre outros, Iván Ferreiro, o rapeiro Hard Gz, Ortiga -un do ex integrantes de Esteban & Manuel-, os garaxeiros Familia Caamgno e o peculiar cruzamento entre floclore e electrónica de Baiuca.

comentarios