Galiza será o primeiro país convidado a Etnocine, o Festival de Cinema Etnográfico de Belmonte que se desenvolverá do 7 ao 11 de abril. Galicia de Carlos Velo será o filme que se proxectará na sección de apertura dun festival que prestará especial atención ao novo cinema galego.
A raia de Iván Castiñeiras, Nacional VI de Pela del Álamo, París 1 de Oliver Laxe, Canedo de Vicente Vásquez e Usue Arrieta e Arraianos de Eloy Enciso serán algúns dos filmes que forman parte da primeira edición do Festival que comparte programación coa Universidade da Beira Interior. O programador do CGAI, Xosé Manuel Sande, colabora co Festival e pronunciará a conferencia “O novo cinema galego”.
Ademais do Galicia de Carlos Velo, a produción histórica galega completarase co documental O carro e o home de Antonio Román e Xaquín Lourenzo.
A mostra, de carácter non competitivo, ten previsto convidar en cada edición un país distinto co fin de difundir os seus filmes documentais e etnográficos a través de colaboradores e programadores como acontece nesta primeira edición con Galiza e Xosé Manuel Sande.
