CULTURA
Um Carvalho de muitas pólas
O rexedor da cidade de Ferrol, Ángel Mato, volveu manifestarse hoxe en contra da decisión da Real Academia Galega (RAG) de trasladar o acto oficial polo Día das Letras Galegas na honra de Ricardo Carvalho Calero da súa cidade natal (Ferrol) a Compostela.
O evento adiouse en varias ocasións e mesmo estivo previsto en Ferrol pero finalmente a Academia decidiu que decorrese esta pasada fin de semana en Compostela. Ante esta opción a corporación en bloque advertiu de que non acudiría ao evento en sinal de protesta.
Malia o aviso, a RAG seguiu coa axenda planificada e esta segunda feira Mato acusou á entidade de “faltar ao respecto” á cidade de Ferrol por non elixila para ese plenario central.
Neste sentido o rexedor lembrou que o homenaxeado neste peculiar ano é orixinario de Ferrol e tamén alí fixo parte da súa carreira literaria.
O alcalde socialista fixo estas acusacións na inauguración dunha mostra da Deputación sobre Calvalho Calero na que tamén estaba presente o presidente da institución, Valentín González Formoso.
“Teño que expresar o meu malestar como alcalde de Ferrol por como foron todos os acontecementos ao longo deste ano excepcional; un malestar que se estende por toda a cidade”, destacou Mato no acto, en plena praza de Armas.
“Xa sei que é tarde pero o que non pode ser é que unha persoa á que se dedica esta distinción non se poda celebrar na súa cidade natal, aquí en Ferrol”, engadiu, asegurando que o Concello ten previsto que 2021 tamén sexa na honra deste veciño de Ferrol Vello.
Se ben é certo que a RAG xa rexeitou centrar outras Letras Galegas no escritor, na súa localidade de nacemento si terá lembranzas na medida das posibilidades do Goberno local.
