Un dos episodios máis dramáticos da represión franquista é o que aconteceu na chamada “A volta dos nove”. Nas Aforas de Baiona na noite do día 15 de outubro de 1936 nove homes, a maioría mariñeiros, eran asasinados despois de seren sacados da prisión. A comarca ficou conmocionada polo brutal acontecemento e a cada pouco nove cruces aparecían pintadas nas pedras á beira da gabia, na volta na que foran asasinados. Borrábanas, mais as cruces volvían aparecer.
“O Faiado da Memoria”, colectivo de recuperación da memoria histórica e documental de Vilagarcía, busca micromecenas a través dunha plataforma na rede para o desenvolvemento dun documental baseado na historia oral, para recoller tamén as testemuñas que lembran o que aconteceu despois do asasinato que tanto impactou no Val Miñor.
A través de micromecenado, “O Faiado da Memoria” rematou a longametraxe documental Desde dentro do corazón, e agora recorre ao mesmo sistema para o novo A volta dos nove, un proxecto no que levan anos traballando e queren agora, con apoio colectivo, rematar.
“O Faiado da Memoria” leva cinco anos traballando na recuperación de memoria, fotográfica, documental e histórica da man dos seus creadores Margarita Teijeiro e Antonio Caeiro, director do novo documental. Caeiro ten xa unha longa traxectoria no documentalismo histórico e participou en proxectos como Aillados, A memoria nos tempos do volfram, Esta noite, velada ou Desde dentro do Corazón, boa parte deles poden atoparse na súa páxina web. Pódese apoiar o novo documental desde a páxina de verkami.
