Espazo Lectura suspende actividades por diferenzas co Concello de Gondomar

Así o informaba esta asociación onte na súa páxina web e no seu Facebook, aínda que a decisión foi tomada o pasado 6 de maio na asemblea xeral extraordinaria desta asociación, onde se tomou o acordo de "suspender todas as actividades na Biblioteca Municipal e renunciar á reserva de crédito de 5.000 euros que o Concello de Gondomar destinaba a pagar as actuacións e visitas dos escritores e escritoras contratados pola asociación para levar a cabo a programación da biblioteca".

Os problemas comezaron, segundo o comunicado publicado por Espazo Lectura na súa propia web, desde a entrada do novo Goberno de Gondomar hai dous anos, capitaneado polo seu alcalde Francisco Ferreiro (PSOE). Desde entón, segundo denuncian, "Espazo Lectura pasou a depender, coma se fose unha pataca quente, de catro concelleiros distintos, incluído o propio alcalde".

Espazo Lectura continuará a desenvolver o seu labor de dinamización e fomento da lectura, especialmente na Casa da Lectura 

Esta actitude rompe, segundo a asociación, con 12 anos de traballo voluntarista no que Espazo Lectura se convertiu nunha referenza en todo o país. "Fixemos todo o posible por recuperar o diálogo", din, pero non foi posible e toman esta decisión logo de que "este 25 de maio rematou o prazo de cortesía sen que, lamentablemente, o alcalde Paco Ferreira mostrase ningunha vontade de recuperar o diálogo logo de dous meses de conflito".

A outros lugares

Iso, si, Espazo Lectura continuará a desenvolver con normalidade o seu labor de dinamización e fomento da lectura, especialmente na Casa da Lectura, onde a asociación creou ao longo de todos estes anos unha biblioteca moderna e funcional aberta ao público e onde ten a súa sede. Tamén afirman no comunicado que "se buscarán outros espazos alternativos que serán anunciados no seu momento". Coma sempre, a todas as actividades de Espazo Lectura poden acudir, de xeito libre e gratuito, as persoas que o desexen, sexan ou non socios e socias da nosa entidade.

Verbo do futuro das actividades da asociación, asumen que a nova situación "supón un cambio importante e Espazo Lectura precisará, a partir deste momento, recalcular e redimensionar o seu perfil, buscar novas vías de financiamento e realizar mudanzas orgánicas que faciliten o seu labor e a supervivencia activa das súas actividades".