Alvarellos, Embora, Kalandraka, Hércules, Nova Galicia, Urco, Xerais, Galaxia e Oqueleo “manterán xuntanzas de traballo con representantes do sector internacional do libro, cunha axenda pechada hai meses”, sinalan nun comunicado da asocación. A maiores, Kalandraka e Nova Galicia tamén montan cadanseu stand.
O certame boloñés atinxe a súa edición número 55 entre esta segunda feira 26 de marzo e a cuarta feira 29 de marzo. É un dos encontros sobre literatura infantil e xuvenil máis importantes do mundo.
A finais do pasado ano, a Xunta comunicou a AGE que se retiraba de catro das cinco feiras internacionais do libro en que viña participando cun posto propio debido a, argumentaba, “un crecente desinterese” das editoriais. Estas axiña responderon e cualificaron de “falsidade” semellante afirmación, ao tempo que amosaban a súa disposición ao diálogo e a modificar aspectos da “presenza do libro galego” nas feiras internacionais.
A asociación iniciou, simultaneamente, os preparativos para asegurarse a súa asistencia a Boloña, independentemente da decisión do Goberno galego. Entrementres, o restabelecemento de relacións entre AGE e Cultura desembocou, hai dúas semanas, na marcha atrás da Xunta, que finalmente si levará stand -compartido coas editoras- a Frankfurt, Guadalajara (México) e Barcelona, e que aceptou boa parte das esixencias do gremio.