O espectáculo As que limpan da compañía A Panadaría, ven de acadar dous recoñecementos, dentro e fóra da Galiza. Por unha parte, o público da XLIV edición da Mostra de Teatro Galego de Cariño elixiu esta montaxe como a mellor obra para público adulto do programa deste ano. Por outra, o público da XXV Feria de Teatro de Castilla y León- Ciudad Rodrigo tamén escolleu a obra d'A Panadaría como Mellor espectáculo de Sala do programa deste ano.
As que limpan é unha coprodución da compañía A Pandaría co Centro Dramático Nacional que se estreou en Tui o pasado mes de febreiro e que, desde aquela, xa xirou por varias prazas da Galiza e do resto do Estado.
Co subtítulo A loita das camareiras de piso galegas, a obra, escrita, dirixida e interpretada por Areta Bolado, Noelia Castro e Ailén Kendelman, aborda “a loita organizada das camareiras de piso dos hoteis por conseguir uns dereitos laborais e sociais xustos. Fronte a elas, a avaricia voraz dos propietarios das cadeas hostaleiras”.
A montaxe volverá en outubro á Galiza, onde se representará en O Grove (día 2), Pontevedra (día 6), O Barco de Valdeorras (día 7), en Ourense, dentro do programa do Festival Internacional de Teatro (día 13), en Carral (día 14), en Moaña (día 16), e en Vigo (do 21 ao 30).
Premio do público infantil
Por outra parte, A nova historia da cigarra e da formiga, de Teatro del Andamio -dirixida por Tatiana Likhacheva e interpretada por Gema Ulloa e Fran Giraldo-, foi a obra escollida para recibir o Premio do Público Infantil na Mostra de Teatro Galego de Cariño.
A Panadaría e Teatro del Andamio recibirán o galardón na na 45ª edición da Mostra, que terá lugar en 2023.
