A exposición chámase Camilo Díaz Baliño e Isaac Díaz Pardo en Compostela. Con Galiza sempre no horizonte. Comisariada por Xosé Ramón Fandiño -estreito colaborador de Díaz Pardo no Instituto Galego de Información- e Gloria López López, válese de valiosa información documental e gráfica.
Escenografía, deseño editorial, os famosos cartaces a prol do Estatuto de Autonomía, son algúns dos materiais que se poderán ver no Colexio de Fonseca en Santiago de Compostela ate o vindeiro 30 de novembro. Na década dos 30, o pai era un significado militante do Partido Galeguista. O fillo, comunista. Este compromiso pasoulles unha altísima factura. Entre os elementos máis rechamantes da mostra atópanse os debuxos que Díaz Baliño, preso na Falcona compostelá despois do golpe de Estado fascista do 36, fixo a compañeiros de presidio.
A segunda parte de Con Galiza sempre no horizonte céntrase na actividade artística, industrial e cultural de Isaac Díaz Pardo, un dos grandes intelectuais galegos do século XX. Este abandonou a súa cidade natal e viviu en Madrid, na Arxentina ou no Castro (Sada). Mais nunca esqueceu as rúas e os lugares compostelanos. De feito, a Galería Sargadelos da Rúa Nova ou o propio Instituto Galego de Información en San Marcos son “iconas compostelás”, a dicir dos comisarios da exposición.
A exposición é unha iniciatiava do Ateneo de Santiago de Compostela e da Universidade, e conta coa colaboración do Concello e mais da Deputación da Coruña.
Nota: fotografía de Isaac Díaz Pardo e Camilo Díaz Baliño en 1925.
![Fillas de Cassandra na gala aRi[t]mar 2023.](/asset/zoomcrop,480,270,center,center/media/nosdiario/images/2024/03/27/2024032717434116054.jpg)