Día Europeo da Música: falta de axudas para a galega

O día 21 de xuño, a xornada de onte, conmemórase, ademais de ser o solsticio de verán, o Día Europeo da Música. Ante esta clasificación, a integrante da directiva da Irmandade da Música Galega, Margarita Viso, cuestiónase "que significa realmente este día? Aínda queda tanto por facer en prol da nosa música", sinala en conversa con Nós Diario. A Irmandade de Música Galega nace "da necesidade de coidar, investigar, difundir e pór en valor o patrimonio musical galego que tan descoñecido e descoidado está". Viso destaca a "gran formación que está adquirir as novas xeracións e non tan novas, que están a realizar traballos de enorme importancia como Isabel Rey Sanmartín". A investigadora estradense ven de publicar con Através Editora, Guitarra galega. Breve historia da viola (violão) na Galiza, unha tese na que afonda sobre este instrumento "e realiza unhas achegas que cambia todo o que se coñecía sobre isto", detalla Viso. Para a membro da directiva da Irmandade "o panorama actual musical no país conta cunha mocidade sobradamente preparada e cun gran nivela de estudos que se están a realizar sobre o noso patrimonio, mais conta co apoio que debería contar por parte das institucións". Nesta mesma liña, a secretaria da directiva de Músicas ao Vivo, Nastasia Zürcher, destaca a este xornal "o gran nivel artístico que estamos tendo, cada ano, cos Premios Martín Códax, vemos como vai en aumento non só as artistas que se apuntan, senón a gran diversidade de estilos que cada ano enchen máis as categorías dos galardóns", comenta. Orzamentos das orquestras e filarmonías Dentro do eixo da falta de apoio á música propia galega das institucións, Viso pon o punto de enfoque nas formacións musicais como orquestras e filarmonía "que reciben uns orzamentos inmensos e están na obriga de divulgar e pór en valor a música feita no país, mais isto só acontece de forma case anecdótica", critica. Por iso pensa que para mellorar a situación "debería existir unha auténtica fiscalización dos programas realizados e unha discriminación positiva en favor da música galega en particular e da ibérica en xeral, o que non quita que se sigan programando grandes clásicos universais como Beethoven ou Mendelssohn", sinala Viso. Para ela, esta sería unha das chaves para que o público coñecese máis patrimonio musical galego, "está claro que se non llo ofreces, e non o escoitan, nunca poderán saber se lles gusta ou no ". Neste mesmo pensamento coincide Zürcher que indica que "todos os anos vemos como os festivais e carteis dos eventos musicais do país teñen moita maior porcentaxe de artistas de fóra que galegas. Este ano, sendo Xacobeo e que moita xente doutros territorios virán a Galiza, tería máis sentido programar artistas nosas e dalas así a coñecer a outra xente", asevera a secretaria de Músicas ao Vivo. Ambas coinciden en que estas melloras teñen que vir dadas desde "todos os apartados, das músicas, da cultura, das institucións públicas e das privadas", expoñen. Maior orzamento desde hai 10 anos Pola súa parte, o presidente da Federación Galega de Bandas de Música Populares, Iván Estévez, ven de acordar coa Agadic o "maior orzamento en axudas que nos conceden, polo menos, desde hai 10 anos, implican 400.000 euros para realizar unha diversidade de programas para mellorar a situación das bandas de música do país", explica o presidente en conversa con Nós Diario. Este ano a Federación acordou coas directivas e as bandas non realizar o certame que se viña realizando en novembro todos os anos, "en prol de poder compartir ente todas as formacións estas achegas a través do programa 'O país das bandas', que comeza este mes de xullo. No cal, as 93 formacións poderán realizar polo menos un concerto durante este ano que será financiado ao 100% pola Agadic". Estévez engade que "a nosa idea é poder chegar ás 100 bandas, mais existen algunhas que non se puideron comprometer a poder tocar ante a falta de espazos para poder ensaiar seguindo os protocolos sanitarios estabelecidos e outras ven como faltan moitos membros da súa formación ante a rotura da rutina de ir tocar coa banda, son cousas complicadas de retomar", explica. Ademais, esta achega da Agadic "tamén servirá para manter o Concurso de Composición, malia que non haxa certame e crear un espazo dixital de xestión para as bandas, para que melloren a visibilidade do traballo específico de cada formación e da labor xeral que realizan as bandas de música populares no seu conxunto", resalta Estévez. Axudas moi dirixidas a un tipo de profesional Pola súa banda, Zürcher expón que "as achegas ao sector da música, nestes tempos de pandemia, estiveron moi dirixidas a un tipo de profesional. Desde a asociación notamos unha gran falta de axudas directas ás músicas, as creadoras de música". Actualmente, a organización está a traballar "en prol das contratacións dignas que as artistas merecen, ao igual que se cumpren se ningún problema noutros sectores laborais", indica Zürcher. De cara a este verán, a secretaria sinala ter esperanza na cantidade de programación que se vai a realizar."Hai que sinalar que este segue a ser un ano semellante ao anterior, polo tema da pandemia, mais xa se comeza a ver unha maior entrada de traballo que vai en proceso de ser un números mínimos naturais", conta. Pola súa parte Viso engade que "todo isto non chegará a realizarse se non chegamos a ser conscientes do noso patrimonio e estar orgullosos do noso" e que "esta conciencia teña a súa repercusión nas institucións públicas. Mais os políticos, pensando a corto prazo como fan, non chegarán a realizar a estrutura patrimonial precisa para situación", conclúe.