Vén de anuncialo o propio Festival de Sitges: Dhogs será a primeira longa en galego nos 50 anos de historia do festival, que define así esta fita: "un relato imprevisible e obsesivo, situado nos límites da ficción". Esta nova únese á selección de 'Trote', a primeira longa de Xacio Baño -tamén en galego-, para o Festival de Donostia.
'Dhogs' será a primeira longa en galego nos 50 anos de historia do festival, que define así esta fita: "un relato imprevisible e obsesivo, situado nos límites da ficción"
O filme está protagonizado por Melania Cruz, Carlos Blanco, Antonio Durán 'Morris', Miguel de Lira, Iván Marcos e María Costas. Escrito e dirixido por Andrés Goteira e producido por Gaitafilmes e Pixels Films, Dhogs sinala os malos nun mundo perverso de amos e escravos, onde os crimes se suceden diante dunha sociedade pasiva e insensible que o atura todo. Un reflexo da realidade máis escura.
50 aniversario de Sitges
Este ano celébrase o 50 aniversario deste emblemático festival, que acollerá o último filme de Yorgos Lanthimos, o mellor cinema asiático, a volta de Jaume Balagueró, premiará a Santiago Segura e contará cunha convidada especial, Susan Sarandon, que levará o Gran Premio Honorífico do evento. Terá lugar do 5 ao 15 de outubro