venres 10.07.2020

D-Ou-Tras celebra dez anos de danza no campus universitario de Ourense

Imaxe do primeiro espectáculo da aula, no ano 2011 (UVigo)
Imaxe do primeiro espectáculo da aula, no ano 2011 (UVigo)

A Aula de Danza do Campus de Ourense D-Ou-Tras celebra o seu décimo aniversario. A iniciativa universitaria mantén estes día a súa actividade de maneira virtual debido ás circunstancias especiais provocadas pola COVID-19. A aula naceu por iniciativa de Marta Alonso e Begoña Cuquejo, de Traspediante Danza, cando presentaron un proxecto de obradoiro de danza para o campus de Ourense. Experiencias semellantes funcionaban daquela na Universidade de Santiago de Compostela  e na da Coruña polo que a Universidade de Vigo (UVigo)  aceptou a proposta. A actividade tivo moi boa acollida cunha media de doce persoas matriculadas por cuadrimestre.

Consolidación

Cos anos o obradoiro consolidouse e incorporáronse á celebración da Mostra Internacional de Teatro Universitario de Ourense (Miteu), promovida pola UVigo, onde en cada edición a aula organiza unha xornada dedicada especificamente á danza contemporánea.

D-Ou-Tras está cada cuadrimestre entre a lista de obradoiros de extensión universitaria que convoca a Vicerreitoría do Campus de Ourense e chegan a 15 as persoas de perfís moi diversos que se interesan polo mundo da danza contemporánea e a creación escénica fundamentalmente a través do corpo e o movemento.

Obradoiro semanal

O obradoiro desenvólvese habitualmente de maneira semanal nas instalacións do campus de Ourense onde as 30 horas do primeiro cuadrimestre están orientadas a formarse nunha base común de ferramentas e as 40 seguintes a crear unha peza escénica que se representa en diferentes contextos universitarios ou afeccionados. Polo obradoiro pasaron tamén múltiples docentes, como Paula Quintas, Maciek Sado, Cristina Vilariño, Nuria Sotelo e Fran Buceta.

Aulas virtuais

Na actualidade, debido á COVID-19, a aula ten trasladado a súa actividade das instalacións universitarias ao eido virtual, concretamente á plataforma Zoom, onde cada terza feira as persoas matriculadas nesta aula reciben clases de corpo e busca de movemento a cargo de Nuria Sotelo e as cuartas feiras de creación de performances a cargo de Begoña Cuquejo e Nuria Sotelo. A través desta plataforma celebraron o pasado 29 de abril o Día Internacional da Danza en colaboración coa Universidade Carlos III de Madrid, onde dez anos atrás D-Ou-Tras representou o seu primeiro espectáculo.

comentarios