sábado 04.07.2020

A cultura real participa nun “convivio” na casa de Manuel María, “activista” das letras

Arredor de catrocentas persoas de asociacións e entidades da cultura de base daranse cita este sábado día 12 en Outeiro de Rei, na Casa Museo Manuel María. O “Convivio da Cultura Galega” busca establecer as bases dun encontro entre asociacións no espazo dedicado a un escritor que percorreu o país participando en milleiros de actos. 

Casa Manuel María
Casa Manuel María

Boa parte de representantes das asociacións que se darán cita este sábado en Outeiro de Rei coñeceron ao vivo a Manuel María, cando participou nalgún da multitude de actos que organizaron ao longo de todo o territorio do país. Milleiros de actividades, desde conferencias até recitais, debates ou roteiros tiveron como convidado de honra a Manuel María, sen dúbida, unha das figuras da nosa historia cultural que máis se significou polo seu compromiso activo coa lingua e a cultura, o que o levaba a aceptar convites de asociacións culturais da Mariña ao Barbanza, de Monterrei á Costa da Morte. 

Son esas mesmas entidades, as protagonistas da cultura real e activa de todo o país as que agora se dan cita na súa Casa Museo de Outeiro de Rei para unha xornada de convivio que busca inaugurar un tempo novo de encontro, coñecemento e colaboración entre os diversos colectivos que están a facer cultura ao longo de todo o territorio. Así como o escritor Manuel María percorreu moreas de veces os camiños de Galiza para contribuír ao traballo das asociacións de base, son elas agora as que volven a súa casa, a se encontrar coa súa memoria e tamén a incorporalo de novo ás súas accións. 

 “O obxectivo é que as asociacións culturais de base nos demos cita na casa de quen foi referente para a cultura galega", Lucía Carreira

"Festa de confraternización" de quen fai cultura

O “Convivio de Cultura Galega” preséntase como unha “festa de confraternización” de asociacións e entidades culturais que traballan desde a base polo país enteiro. A Casa Museo Manuel María e a carballeira de Santa Isabel son os espazos nos que se desenvolverá unha xornada na que a música, o teatro, a literatura e a figura do escritor estarán presentes ao longo dun día no que o encontro e o intercambio de experiencias son algúns dos obxectivos. As Bandas de Rábade-Begonte e Solfa de Santiago abrirán o programa ás 10:45 na p raza do Concello. Serán máis de 50 instrumentistas tocando ao tempo, mostrando a enerxía das agrupacións que dinamizan á mocidade arredor da música. Despois dunha visita á casa e a proxección de distintos audiovisuais e unha representación por parte da agrupación Medulio de Ferrol as persoas asistentes participarán nunha ofrenda floral na tumba de Manuel María no cemiterio de Outeiro para, a seguir, dirixirse á  carballeira de Santa Isabel onde actuarán as Bandas de música de Solfa e Rábade-Begonte, ademais do Coro de Solfa antes de partillar nun xantar popular.. O contacontos de “Fabaloba”, e a festa colectiva ocuparán a tarde antes de que “Pepe Vaamonde Grupo” peche o programa por volta de 18:45 horas.

Mais ao longo da xornada aproveitarase tamén para desenvolver unha xuntanza das distintas asociacións participantes. “O obxectivo é que as asociacións culturais de base nos demos cita na casa de quen foi referente para a cultura galega. Ademais do convivio e compartir a actividade que están a desenvolver as distintas asociacións, queremos tamén que se visite a casa e convidar a que se coñeza a dimensión de Manuel María e que as propias asociacións nos comprometamos a difundir a súa obra”, explica Lucía Carreira, da Agrupación Cultural Solfa, que conta cunha coral que musica os seus poemas como mostrará ao longo do encontro ao cantar temas como “Rosas a Saleta”, “O carro” ou “O cuco”. 

As posibilidades da obra de Manuel María

“Queremos que as asociacións culturais de base nos coñezamos, e ter a oportunidade de compartir as actividades. Consideramos que esta cita é importante e tentaremos consolidala en edicións posteriores de maneira que cada entidade poda traer a Outeiro as súas iniciativas. Queremos tamén que as asociacións coñezan e teñan clara a relevancia da obra de Manuel María e as súas posibilidades para adaptala ás distintas actividades das asociacións”, engade Lucía Carreira. 

Asociacións como Medulio, Pomba do Arco, Altofalante, Lumieira, Instituto de Estudos Galegos, O Galo ou Auriense, entre outras moitas, teñen confirmado a súa asistencia ao convivio de Outeiro de Rei, unha cita aberta á que se pode asistir mesmo sen confirmación previa. A organización está a cargo da federación Galiza Cultura, a agrupación Solfa, a Fundación Manuel María co apoio da Vicepresidencia da Deputación de Lugo. Na propia xuntanza valorarase a posibilidade de consolidar o “convívio” como cita anual. 

A cultura real participa nun “convivio” na casa de Manuel María, “activista” das letras
comentarios