xoves 05/08/21
Cultura

Cultura foca as peticións ao Goberno estatal no Xacobeo

O Conselleiro de Cultura e Turismo, Román Rodríguez, trasladou ao ministro de Cultura, José Manuel Rodríguez Uribes, as peticións da Xunta en material cultural
Román Rodríguez na videoconferencia co ministro de Cultura.
Román Rodríguez na videoconferencia co ministro de Cultura.

O conselleiro de Cultura e Turismo, Román Rodríguez, mantivo onte unha reunión por videoconferencia co ministro de Cultura, José Manuel Rodríguez Uribes, na que participaron tamén responsábeis doutros territorios e da Federación Española de Municipios e Provincias (Femp). A principal reivindicación do representante da Xunta ao Goberno estatal foi a solicitude de ampliación até 2022 das desgravacións fiscais previstas para o Xacobeo, medida que polo momento ten por límite o 30 de setembro de 2021. Segundo alegou, isto permitiría "seguir estimulando as achegas privadas e captar máis recursos", o que repercutiría no desenvolvemento de proxectos culturais e turísticos.

Rodríguez reiterou a petición de convocar un Consello Xacobeo extraordinario "para avaliar a situación do Camiño de Santiago" que, ante a proximidade do primeiro Ano Santo nunha década, "debe actuar como un motor de reactivación económica para as industrias creativas e a dinamización das zonas rurais". O titular de Cultura presentou tamén un paquete de medidas en materia fiscal e financeira, laboral ou de fomento do consumo, e trasladou as necesidades específicas do sector cultural galego, recollidas nas últimas semanas a través dunha rolda de encontros con representantes do audiovisual, o teatro, a danza ou o eido editorial.

Rodríguez amosou a vontade de colaborar co Pacto de Estado ao que chamou o ministro e avanzou que a Xunta está a traballar nun plan de reactivación cunha dotación prevista de 25 millóns de euros, coa prioridade de "manter o emprego" no sector, dado que será un dos últimos en saír da parada provocada pola actual emerxencia sanitaria.

comentarios