A deputada nacionalista Mercedes Queixas, que o denunciou no Parlamento galego, sinala en declaracións a Nós Diario que a decisión de non investir a totalidade do orzamento previsto para esa anualidade prodúcese, precisamente, nun momento onde o sector cultural está a padecer de xeito moi acusado as consecuencias da pandemia.
Queixas indica que o último Barómetro da Cultura galega certifica que “75,7% das empresas enquisadas segue a padecer unha facturación inferior á de 2019, sendo as artes escénicas as que padeceron perdas na facturación superiores a 50%”.
Na mesma liña, significa que “en xullo de 2020, só 3,3% das empresas tiñan expectativa de non ter perdas na facturación”, porén, un ano despois, "esa porcentaxe sobe a 22,7%”, malia a ser “a cultura unha das actividades máis seguras que se desenvolveron”.
Sector do libro
A deputada exemplifica nas políticas destinadas ao sector do libro a “incapacidade” e o “desleixo”, dixo, do Goberno do PP nas partidas “dedicadas a dinamizar a lectura en galego, que son 60% menores que no ano 2009”, malia ser maior o orzamento de 2022.