“É unha xornada lúdica e festiva, de convivencia, de recuperación do espírito comunitario da tradicional romaría de Santa Isabel de Outeiro de Rei”, explican os organizadores, “e está aberta a todas as persoas e a todo o asociacionismo cultural de base que se move en Galiza”.
Coa Casa Museo Manuel María colaboran no convivio a Federación Galiza Cultura, as asociacións culturais Solfa de Compostela e Agra do Orzán da Coruña e mais a Deputación de Lugo.
O programa da xornada de lecer comezará ás 11.30 da mañá cun acto de acollida na horta da casa. Actuará o grupo tradicional Untia e o coro Solfa. Unha hora despois, haberá unha ofrenda floral a Manuel María no cemiterio de Outeiro de Rei. A banda municipal Sons e Soños -que xunta os concellos de Rábade, Outeiro de Rei e Begonte e dirixe Armando Morales- ofrecerá un concerto antes de xantar. Será na carballeira de Santa Isabel á unha do mediodía.
Á tarde, continúan as actividades. Ás catro e media, a compañía Pereira de Lobos representa o espectáculo de monicreques Berenguela. Aventuras e desventuras dunha espiña de toxo. Xurxo Souto encargarase de animar a foliada “para cantar e bailar” coa que pechará, a partir das cinco, esta quinta edición do Convivio da Cultura Galega.
Nota: cartaz da xornada.
