Orixinal de 1915, Mal de moitos é un “pequeno sainete” ambientado na parroquia de Ferreira, en San Sadurniño e dedicado ao coro Toxos e Froles, do que Charlón foi fundador. Como o foi da Irmandade da Fala de Ferrol.
A versión que se representará este sábado, ás oito do serán, na Casa Museo de Manuel María contará cos actores Roberto e Felipe Vázquez. A maquillaxe e o vestiario, a cargo de Ánxeles Fernández. E a dirección, da man do político e ensaísta Francisco Rodríguez.
De Charlón e Sánchez, activistas culturais da órbita das Irmandades, escribiu Ricardo Carvalho Calero: “Foron dous artistas de Ferrol que disfrutaron un tempo de grande popularidade. Socios entusiastas do laureado coro local Toxos e Froles, compuxeron pasos e sainetes que podían sempre ser intepretados por dous actores. Eles mesmos daban a coñecer así as súas pezas”.
Euxenio Charlón naceu en Santa Cecilia de Trasancos (Ferrol) en 1887 e morreu en 1930. Manuel Sánchez Hermida viviu entre 1888 e 1940 en Ferrol. Xuntos asinaron obras como Calquera entende este enredo, Nocturno periodístico, Trato a cegas, Axúdate, O Menciñeiro e Polo pan baila o can.
