A procura dun maior realismo na experiencia de ver cinema sempre foi unha constante na sétima arte e non é algo novo.
É o caso das tres dimensións (altura, anchura e profundidade) que no cinema ten a súa orixe no ano 1890 aínda que non sería até 1923 que se chegaría a presentar a nivel internacional a primeira longametraxe que non acadou o éxito esperado por non ter superado, aínda, a barreira do branco e negro.
Coa chegada dos filtros polarizados todo muda e en 1953 xorde o primeiro grande éxito coa película House of Wax. O desenvolvemento de novas lentes e sistemas a partir dos anos 60 foi perfeccionándose até a chegada nos 80 do sistema IMAX.
Algúns éxitos en 3D e a achega galega
Co cambio de século a promoción deste tipo de películas aumentou coa apertura de novas salas nos denominados Multicinemas polo que o número de títulos para gozar en tres dimensións tamén aumentou.
Entre os máis sinalados, por poñer algúns, están Beowulf (2007), protagonizada por Angelina Jolie; Avatar (2009), que reforzou unha nova imaxe en 3D ou Gravity (2013).
A primeira película 3D animada de Europa foi a galega 'O bosque animado'
A Galiza tamén se incorporou ao cinema 3D, cunha importante presenza sobre todo no que atinxe á animación. Neste eido sobresaen os Estudos Dygra Films que se sumaron a esta tendencia.
Esta compañía realizou a primeira película 3D animada en Europa, O bosque animado (2001), o primeiro anuncio en Dixital 3D estereoscópico na historia da publicidade estatal, (Campaña Movistar 2008-2009) e a primeira película animada en Dixital 3D en todo o Estado español, Noite de paz? (estreada no Nadal do 2010).