Coa representación de Jácara para un pícaro o la España negra, da compañía galego-andaluza La Griot'te, comezou onte a XXIII Mostra de Teatro Clásico de Lugo, que ofrecerá 14 representacións até o día 26 de marzo na cidade da muralla.
A seguinte función do festival terá lugar o vindeiro día 5, con Píscore Teatro interpretando Molto Barroco, un espectáculo co que a compañía ofrece a posibilidade de desfrutar, desde o teatro e o humor, da música da época barroca.
O día 9 será a quenda dos cataláns Rhum & Cia, un dos fenómenos do circo dos últimos anos, que presentarán unha adaptación á linguaxe circense de El diablo cojuelo, de León Ladrón de Guevara.
Ao día seguinte, Yllana levará a escena Maestrissimo, un espectáculo musical co tratamento de comedia habitual na compañía madrileña.
O día 11, a compañía Ay Teatro representa Vive Molière unha visión delirante, desenfadada e iconoclasta do comediante francés. O 12 de marzo, as asturianas de Teatro del Cuervo levan a Lugo Justina y Jacinta, a historia de dúas mulleres que forman un ñaque -compañía ambulante de só dous intérpretes. O 17, será a compañía madrileña EscénaTe a que represente El animal de Hungría, unha comedia pouco coñecida de Lope de Vega.
Shakespeare e Sófocles
A sempre hilarante Companhia do Chapitô, de Lisboa, leva até Lugo a súa versión de Antígona o día 18 de marzo.
O 19, a premiada compañía Pedras de Cartón presenta -despois do éxito acadado co seu Quixote- o seu novo espectáculo Os contos de William Shakespeare.
A novidosa Iphixenia na porta do súper, en versión da Compañía Humana, poderase ver no festival o 23 de marzo. Interpretada por Alba Caneda e dirixida por Sara Rey Seoane, a obra de Gary Owen revisa o clásico de Sófocles desde unha óptica social.
O día 24, Hilo Producciones representa I love Catalina, versión libre e gamberra da shakespeariana The Taming of the Shrew. E o 25, poderase gozar de Menina. Soy una puta obra de Velázquez, un monólogo de Nuqui Fernández que aborda o acoso e a gordofobia.
A Mostra remata o día 26 con Carreta y manta, da compañía Sinfín, e con Elektra.25, outra versión de Sófocles, da prestixiosa compañía Atalaya.