Tampouco o Centro Dramático Galego nin o Centro Coreográfico Galego contan, a día de hoxe, con director ou directora. Fefa Noia abandonou o pasado maio a dirección do primeiro. No segundo, hai un mes que Mercedes Suárez, coordinadora do Departamento de Produción Coreográfica de Agadic, cesaba no posto, que incluía a xefatura do Centro Coreográfico.
A situación do CGAI, con sede na Coruña e funcións de “salvagarda e difusión do patrimonio audiovisual galego”, é análoga. Sen proceso de substitución en marcha, a saída de Escrigas e os continuados recortes de persoal colocan a institución cultural nun delicado interregno.
O Centro Galego das Artes da Imaxe constituíuse en 1989. “As súas principais funcións no ámbito audiovisual son a recuperación, a catalogación, a custodia e a difusión das producións e obras do patrimonio audiovisual e fotográfico galego, así como a programación de proxeccións, exposicións, conferencias e publicacións co fin de proporcionar un maior recoñecemento das artes da imaxe”, di a institución na súa páxina web.
Arquivo, mediateca, con sala de proxeccións e oficinas, o CGAI fai parte desde 1999 da Federación Internacional de Arquivos Fílmicos.