xoves 02.07.2020

Un cento de actividades na Feira do Libro da Coruña

Arredor de cen actividades relacionadas coa lectura e case corenta postos de librarías e editoriais son os datos da Feira do Libro da Coruña que abre as súas casetas nos Xardíns de Méndez Núñez o próximo día 1 de agosto. 

Feira do libro da Coruña no 2012
Feira do libro da Coruña no 2012

Será, sen dúbida, como todos os anos, un dos acontecementos culturais do verán coruñés. Do xoves 1 ao domingo 11 de agosto os Xardíns de Méndez Núñez serán unha avenida literaria pola que atravesarán algúns dos máis relevantes autores e no que se darán conta das novidades editoriais da tempada. Presentacións de libros, música, debates e sinaturas de autores son algúns dos apartados do amplo programa que, como en todos os encontros organizados pola Federación de Libreiros de Galicia, ten un amplo espazo adicado á produción cultural e o lecer infantil. 

Yolanda Castaño será a encargada do pregón inaugural o día 1 de agosto e, a partir de aí, comezarán  os autores e autoras a pasar pola feira de libros, sen dúbida a máis concorrida de creadores da tempada. Manuel Rivas, un clásico xa na feira da Coruña protagonizará algúns dos, de seguro, actos con máis audiencia, entre eles  o que se presenta o día 5 de agosto como “Máis Luzes para Galicia. Xornalismo e cultura en crise” canda o xornalista Xosé Manuel Pereiro.

Dúcias de nomes 

Para todos os gustos e idades está pensada unha programación que pasará da literatura gastronómica á política, da novela á poesía e un sinfín máis de actividades para achegarse á cultura máis nova neste verán coruñés. Bautista Álvarez, Pablo González Mariñas e Franco Grande presentarán os seus novos libros nos que a literatura e a política, de diferentes maneiras, se dean a man. 

Luís Rei Núñez, Ramón Nicolás, Miguel Anxo Fernández, Antón Riveiro Coello, Chisco Fernández Naval, Xosé Neira Vilas, Alberte Blanco, Pedro Feijóo,Yolanda Castaño, Miguel Vázquez Freire, Chelo Suárez, Xulio Valcárcel, Ramón Loureiro, Correa Corredoira, José Luis Gómez, Manuel Portas ou Manuel Loureiro serán algúns dos autores que presentarán os seus libros ou protagonizarán unha sesión de sinaturas na Feira da Coruña. 

Como acontecera en Vigo, a Editorial Galaxia programa no marco do encontro coruñés, a Semana de música infantil con Uxía, Pablo Díaz ou Mamá Cabra entre outras propostas. 

A mesa “Escribir en galego para que nos lean en todo o mundo” con Francisco Castro, Xabier López, Alex Bilbao e  Mercedes Queixas ademais da presentación do libro “Los mejores poemas de amor” con Luz Pozo Garza, Olga Patiño Nogueira, Miguel Anxo Fernán-Vello, Chema Paz gago, Basilio Rodríguez Cañada e Antonino Nieto Rodríguez son dúas das oportunidades de achegarse ao debate literario no programa da Feira. O programa completo cos distintos horarios pode consultarse aquí. 

Despois da Coruña, que é a sétima das once Feiras do Libro de Galiza que organiza a Federación de Libreiros, virán aínda Viveiro, Foz e Monforte de Lemos para rematar de 25 a 18 de agosto en Rianxo.  

comentarios