Este sábado atoparás nos quiosques, xunto ao teu exemplar de Nós Diario, o semanario Sermos Galiza, que protagoniza o texto de Carlos Callón, e o adianto que Nós Diario ofrece do seu último libro, O libro negro da lingua galega (Xerais).
Trátase dunha ferramenta útil para a restauracón social do galego, que recolle unha antoloxía de casos de represión do galego, que abarcan desde finais do século XV até finais do XX.
'Reboiras poliédrico'
O Sermos deste sábado prosegue cunha entrevista do escritor Luis Rei Núñez, autor da novela Matarán a Reboiras. En Reboiras Poliédrico, o autor e Montse González conversan sobre un libro que trata, entre outros temas, "sobre a menoria e os ideais que abrazamos".
A novela aúna fitos históricos como a crise das vacas tolas, o Prestige, a guerra de Iraq e a de Afganistán, a loita contra unha regasificadora na ría de Ferrol. a guerrilla antifranquista e a loita obreira no Ferrol de primeiros dos anos 70.
Xulio Maside
Por outra parte, Carlos L. Bernárdez asina a peza Xulio Maside. Un artista mergullado no vivo latexar do país, na que repasa a traxectoria vital e artística de Xulio Maside, falecido este mesmo ano.
"O noso artista tivo, co seu activismo cultural e social, unha presenza notábel na cultura galega, nomeadamente en Santiago de Compostela, a súa cidade -onde exerceu a medicina- e centro da súa traxectoria vital e artística", explica Bernárdez.
Música, arte e lecer
O apartado musical corre a conta de Belén Tajes, que trae as últimas novidades, mentres César Morán asina un artigo titulado 'O máis parecido ao karaoke'.
Como vén sendo habitual, o experto en cinema Andrés Castro analiza os filmes máis destacados, a comezar por Sandown, de Michel Franco, e Manuel Xestoso ofrece na sección de Escena unha análise da obra de Continente María, de A Quinta do Cuadrante
Noutra orde, Mario Regueira debulla o libro O povo improvisador, de Sechu Sende. Aliás, o colectivo Xea dá unha visión da Cenlle, nunha nova edición do Andar e Ver.
Por último, as dúas páxinas de pasatempos corren a conta de Xerardo R. Roca e Xoán Costa.
Lembra que podes atopar o Sermos Galiza este sábado acompañando o xornal Nós Diario; 64 páxinas por tres euros.