Camilo Franco, novo director de Culturgal

Culturgal arrinca este ano cunha nova persoa á fronte. O xornalista, xestor cultural e escritor Camilo Franco asume a dirección dunha edición que terá lugar entre o 1 e o 3 de decembro. Culturgal é un lugar de encontro das empresas culturais que favorece e promove a cooperación e o apoio mutuo. Un espazo que quere pór en contacto artistas, creadoras e creadores e compañías con profesionais da xestión cultural, programadores, empresas e institucións. Mais tamén quere ser un escaparate de cara ao público, unha feira que demostre o interese que existe pola cultura e a importancia que esta ten como sector estratéxico. De entrada, é nesa duplicidade onde o novo director quere intervir: "Creo que Culturgal ten que estar moito máis volcada cara ao público -ou aos públicos- e que o sector profesional ten que estar presente na medida en que teñan que relacionarse con eses públicos que asisten á feira", explica Franco en conversa con Nós Diario. "Por suposto, van seguir organizándose encontros profesionais, pero con algúns matices diferentes. En primeiro lugar, temos a intención de que Culturgal sexa un lugar de encontro entre profesionais de diferentes disciplinas: os escritores ou os músicos, por exemplo, teñen outros foros onde reunirse e, se cadra, é moito máis rico que Culturgal sexa o escenario de encontros entre músicos e escritores". Pero ademais, Camilo Franco quere propiciar un cambio na forma en que, tradicionalmente, o mundo da cultura se relaciona co seu público. "Sempre hai dúas posibilidades: podes falar das dificultades que tes para sacar adiante un produto ou podes incidir nas virtudes que cres que ten ese produto. Polas circunstancias de minorización en que se move a cultura galega e que todos coñecemos, tendemos a pór o foco no primeiro, pero creo que Culturgal é o lugar propicio para visualizar as virtudes, para debater sobre os puntos de encontro entre a cultura e o seu público. O diálogo entre público e profesionais sempre é bo, pero creo que é máis produtivo que ese diálogo se centre nas preocupacións do público e non nas de profesionais" afirma o novo director da feira. "Creo que se vas montar un Hamlet o público vai sentirse máis concernido se explicas o que vas facer con Shakespeare que se te pos a enumerar os problemas que tes coas subvencións da Agadic". Culturgal deita a mirada sobre as asociacións profesionais Expandirse no tempo e no espazo O novo director de Culturgal tamén quere revisar a fórmula de feira puntual que ten a Culturgal. "Debe ser algo que estea presente na vida cultural ao longo de todo o ano, debe existir un traballo continuado que culmine nos días do encontro en Pontevedra. Debe organizar e promover actividades en toda a Galiza que sirvan de motor para a cita de decembro. Non pode ser un fenómeno de tres ou catro días, debe expandirse no tempo e no espazo se quere manter a súa natureza de evento para todo o país". E a nova fórmula buscará, igualmente, redefinirse para buscar unha maior proxección de futuro. "Máis que un resumo de que aconteceu, Culturgal debería ser un adianto do que vai suceder nun futuro inmediato. Que as persoas que asistan saian cunha idea de que libros van publicarse, que filmes van estrearse ou que grupos sairán de xira para presentar un novo disco. En certa forma, trataríase de achegarse ao mainstream, un concepto difícil de definir nunha cultura minorizada como a nosa, pero que debemos abordar para que a xente sinta curiosidade por saber o que pode agardar do ano próximo. Camilo Franco constrúe un piso para subverter as convencións literarias Ampliar públicos En certo sentido, os propósitos para esta nova edición pasan sempre por reforzar a importancia do público. "É que se non hai público, non hai cultura. A cultura galega, historicamente, necesitou centrar moitos esforzos en autoorganizarse, en armar estruturas que lle permitisen sobrevivir e actuar como unha cultura normalizada. E daquela, o público pasou a ser a última instancia na que se pensaba. E se ben é certo que existe un público ben informado, cro que Culturgal non pode renunciar a buscar novas audiencias que ensanchen a vida cultural deste país". Se cadra, despois de quince anos a fórmula baixo a que naceu Culturgal tiña que ser revisada, como parece indicar a diminución nas cifras de asistentes á feira nas últimas edicións. "A todas as culturas lles custa adaptarse aos cambios no comportamento do público, e máis nunha cultura tan necesitada de protección como a nosa. Por iso se precisan novas estratexias de comunicación que atendan o que a xente espera de nós". Eva Alonso: "Cremos que as crianzas deben ser educadas desde pequenas nas accións culturais do país"