Un Caldo con todos os ingredientes das novas músicas galegas

Impuxéronse a Ukestra do Medio, Koroiev, crnds e Momboi no Concurso Fran Pérez Narf de 2020. Gañaron o premio a Mellor proxecto de música folk nos Premios Martín Códax da Música dese mesmo ano. Editaron un primeiro disco que os situou na primeira liña dos novos grupos que cultivan a música tradicional. E agora sacan un segundo álbum que marca diferenzas e promete consolidar a súa posición. Anaïs Barbier (voz e pandeireta), María Jorge (violín) e Pedro Fariñas (guitarra e gaita) forman Caldo, unha banda que escala postos a toda velocidade no ránking da música galega de raíz. Lugar A Ponte, o novo traballo de Caldo, transita por diversas influencias que o distancian das sonoridades folk máis ao uso e abren camiños novos para a música tradicional. "Nós non somos moi conscientes deses cambios estilísticos", declara Anaïs Barbier en conversa con Nós Diario. "Compoñemos cancións segundo o que imos escoitando e segundo o momento vital que pasamos, non hai unha intención preestabilizada. Si é certo que despois, ao escoitar os temas gravados, descubrimos algunha influencia pop, por exemplo, pero son cousas das que te decatas cando a peza xa está feita". Do que si son moi conscientes é da progresión no estudio de gravación. "Caldo, o noso primeiro disco, foi gravado practicamente en directo, sen un traballo previo nin apenas unha posprodución digna de mención. En Lugar A Ponte houbo un traballo de preprodución moi elaborado e, no estudio, quixemos engadir outras capas e texturas, agregar outros instrumentos... Fomos xogando con outras sonoridades", explica Barbier, quen asina, ademais, unhas letras propias que van máis alá da adaptación de textos tradicionais entre as que movían até o de agora. Nese labor de produción, contaron coa colaboración de Alberto Cernadas (crnds), quen participou case como un membro máis da banda durante o proceso de gravación. "A crnds coñecémolo no concurso Fran Pérez Narf, competiamos con el", relata a cantante de Caldo. "E a conexión con el, a admiración mutua foi instantánea. Desde aquela, mantivemos o contacto e, cando gravamos o sinxelo Acorro, chamámolo para que o producise. O resultado foi moi satisfactorio e á hora de entrar a gravar Lugar A Ponte, xa decidiramos traballar con el. De feito, aínda que as pezas estaban moi acabadas cando comezamos o proceso, deixamos un lugar para a creación, para que el fose incorporando os elementos que considerase precisos". Novos contextos sonoros Ademais de crnds, que participa con guitarras e teclados no repertorio, Caldo conta tamén coas colaboracións de German Díaz (zanfona en "Arroz, ovos e solís"), Luis Peixoto (mandolina en "Chulinha das Cacharelas"), Diego Alonso (saxo soprano en "36388") e Claudia Abril, Flor Díez e Marta Collazo ("pandeiretas en 36388"). Son contribucións que xurdiron de forma moi natural. Se facemos unha chulinha parece acaído incorporarmos unha mandolina portuguesa e coñecendo a Luís Peixoto, pois chámalo para que participe", explica Barbier. O resultado deste traballo intégrase na actual tendencia da música tradicional de hibridarse con outras músicas, a mergullarse en contextos sonoros contemporáneos sen perder a súa esencia. "Supoño que iso é o que tiña que pasar de forma natural. Moitos dos que facemos tradi non nos sentimos identificados ao cento por cento coas formas máis puras e integrar outras influencias é algo que fai parte da cultura globalizada na que vivimos inmersos. Non creo que iso signifique desnaturalizar a música tradicional, non vexo resistencias na xente que se dedica á música nin no público". Unha tendencia que conta co favor da xente máis nova, que crea públicos e que parece contar cunha certa expectativa de futuro. "O que nos di a historia é que a música tradicional ten momentos de gran calado no público de forma cíclica", resume Barbier, "xeralmente asociados ao éxito dalgún grupo ou dalgún solista concreto. Vai por rachas. Porén, agora a música galega e en galego está moito máis presente en todos os estilos, e iso fai pensar que o actual boom pode dar lugar a algo máis estábel, mais duradeiro". O necesario apoio das institucións Iso si, sempre que se conte cun apoio institucional que agora se percibe como escaso. "As institucións -pero todas, desde o concello máis pequeno até a Xunta da Galiza- deberían ser máis conscientes da importancia do patrimonio que posuímos e apostar de maneira máis firme pola música feita na Galiza. Non se trata de apoiar o que ten éxito, ou o que está de moda nun momento determinado, senón de incrementar a educación e a cultura musical, de consolidar unha política cultural con vistas ao futuro. E por suposto, de apoiar os que estamos traballando nisto: moitas veces non temos nin unha pequena axuda para dar un concerto fóra, para a viaxe, e mentres vemos a onde se destinan os millóns de euros dalgúns festivais". 'Lugar A Ponte' preséntase en Compostela o 9 de xuño Caldo presenta Lugar A Ponte o vindeiro día 9 de xuño, ás 20.30 horas, no Teatro Principal de Santiago de Compostela. "Agora mesmo estamos moi centrados nesa presentación", explica Barbier. "Como a finais de 2022 anunciamos unha pausa por motivos persoais -a chegada dun novo membro da familia- non temos demasiadas datas marcadas. Pero iso non quere dicir que non haxa movemento. Este verán haberá concertos na Galiza e mesmo volveremos a Barcelona para un par de actuacións. En todo caso, estamos tomando con calma o proceso, pensando no outono para unha xira de presentacións por teatros, aínda que o feedback que estamos recibindo xa agora é moi bo e é moi esperanzador". Pensar no exterior Barbier declara que queren aproveitar esa oportunidade de mercado que abriron en Catalunya e tratar de seguir por ese camiño. "Quixéramos tratar de saír pola península, aproveitando esa vaga de interese que se está dando pola música tradicional galega. E tamén temos contactos en Portugal, tender pontes cara á lusofonía parécenos imprescindíbel. Agora mesmo hai xente en Braga traballando con músicos da Galiza e talvez por aí poidamos abrir un oco".