sábado 04.07.2020
O Festival de Curtas enche de cinema a vila do Morrazo

Bueu: 128 filmes, 70 estreas

Entre o 6 e o 14 de setembro o cinema mandará en Bueu. Nada menos ca 128 filmes, 70 dos cales son estreas en Galiza, e 65 actvidades conforman o programa a décimo segunda edición do Festival Internacional de Curtametraxes da vila do Morrazo
Fotograma de 'Acadamia', filme canadiano que participa no Festival Internacional de Curtametraxes de Bueu dentro da sección Experimental. Imaxe: FIC Bueu.
Fotograma de 'Acadamia', filme canadiano que participa no Festival Internacional de Curtametraxes de Bueu dentro da sección Experimental. Imaxe: FIC Bueu.

O seu director Manuel Pena salientou na presentación insitucional da cita o “enorme impacto cultural na contorna”. Para sintetizalo falou das 70 estreas galegas e das 30 estatais, “o que amosa a dimensión que ocupa o festival dentro da industria cinematográfica”. Mais non só falou do punto de vista industrial: “Aquí o público pode achegarse a obras doutro xeito inaccesíbeis”.

As cifras da edición número 12 do festival de Bueu supoñen un récord na historia do certame. Que inclúe ademais outras novidade. Ás catro seccións habituais -Galicia R, España, Internacional e Panorama- e ás destinadas a audiencia mái moza, súmanse nesta ocasión outras dúas: Experimental e Nouvelle Vague. Galicia R proxectará as últimas pezas de Arancha Brandón, Khris Cembe, Pedro Sancho, David Fidalgo, Martín Romero e Álvaro Gago. O cineasta Xacio Baño, autor da celebrada Trote (2018), ou o actor Luís Zahera, que recentemente recibiu un Goya e desta volta recollerá o premio Cinema Galego do encontro, ofrecerán charlas.

Polos espazos radiofónicos asociados ao festival pasarán o cineasta Paco Plaza ou as actrices Uxía Blanco, Mabel Rivera ou María Vázquez, ademais dunha ducia de actuacións musicais. Nas actividades paralelas están o Mercado de Curtametraxes, a Ruta de Tapas 5 Estrelas ou o Mini FIC, dirixido á rapazada.

No mesmo acto de presentación, o alcalde de Bueu Félix Juncal lembrou como o festival “está medrando a carón da man da xente, da súa masiva asistencia, da capacidade de innovar e de organizar que demostra cada ano”. E o director da Axencia Galega das Industrias Culturais (Agadic), Jacobo Sutil, oufanouse do “momento brillante do sector audiovisual galego”.

Agadic é, co concello e a Deputación de Pontevedra, un dos patrocinadores do Festival Internacional de Curtametraxes de Bueu, que organiza a asociación do mesmo nome. No seu web (www.ficbueu.com) pódese consultar a programación completa.

comentarios