BICENTENARIO DO AUTOR DE 'ENSAYOS POÉTICOS EN IDIOMA BERCIANO'

O Bierzo reivindica a Fernández Morales como figura do Rexurdimento

Este sábado 17 de xuño, mentres a RAG elixe o futuro -ou a futura- homenaxeada, no Bierzo réndenlle homenaxe a Antonio Fernández Morales, un autor esquecido a este lado da raia de quen se cumpren este ano 200 anos do seu nacemento. 

fdezmorales
photo_camera Antonio Fernández Morales (Astorga 1817 - Cacabelos 1896)

Hai un ano Antonio Fernández Morales quedaba segundo na votación da RAG para ser homenaxeado este ano. Era o grande obxectivo do movemento cultural berciano: que fose o home das Letras 2017 coincidindo co bientenario do seu nacemento. Pero non puido ser, Casares pasoulle por riba, pero a decepción non impediu que as asociacións culturais se implicasen nesta efeméride, que celebrará este sábado o seu primeiro grande acto. 

Silveiro: "Queremos que sexa recoñecido como unha figura entre os Precursores e tamén no Rexurdimento, dado que é o segundo autor que publica en galego despois de Pintos e previo a Rosalía de Castro"

Será este sábado 17 en Cacabelos, onde se lle renderá homenaxe ás 11.30 diante da súa casa na Rúa Santa María, e logo en La Monchoa inaugurarase unha exposición titulada "Fernández Morales hoxe: creacións e recreacións". Tamén se presentará a obra 'Antonio Fernández Morales, autor berciano. Bicentenario do seu nacemento (1817-2017)', que inclúe poemas do autor e de poetas contemporáneos que se inspiraron nel, como Carme Penim, Igor Lugrís, Romina Bal, Mercedes Queixas ou Manuel González Prieto -tamén coordinador do volume-, entre outros. Na presentación do libro sobre o escritor berciano participarán Anxo Angueira, presidente da Fundación Rosalía, e os académicos correspondentes da RAG Héctor Silveiro e Henrique Costas. 

Simposio en setembro

Este acto será un preámbulo das celebracións que terán lugar en setembro, arredor do día do seu nacemento, o 17, segundo nos conta Héctor Silveiro. O máis destacado será un simposio de tres días arredor da súa figura, organizado pola Academia Galega no Bierzo, ademais doutros actos, algún deles na Coruña. 

A idea é que Morales "deixe de estar na marxinalidade e pase a formar parte da cultura galega", afirma Silveiro

Precisamente con motivo deste bicentenario Edicións Positivas vén de publicar 'Ensayos poéticos en dialecto berciano', a princpal obra deste militar nado en Astorga, publicada antes que os libros en galego de Rosalía. 

Precisamente ese é o obxectivo dos colectivos que están detrás da celebración deste bicentenario, como o Grupo As Médulas de promoción da lingua e a cultura galega no Bierzo, organizadora do acto. "Queremos que sexa recoñecido como unha figura entre os Precursores e tamén no Rexurdimento, dado que é o segundo autor que publica en galego despois de Pintos e previo a Rosalía de Castro", afirma Silveiro.

A idea é que Morales "deixe de estar na marxinalidade e pase a formar parte da cultura galega", o que é tamén un xeito de integrar o Bierzo no conxunto da nosa cultura. "É un proceso paralelo, Morales está sendo descuberto de forma paralela a que o galego se está a incorporar nas escolas bercianas, e que medra a reivindicación do galego na comarca", explica Silveiro, quen nos conta que o movemento de defensa da lingua e da cultura no Bierzo leva desde 1999 traballando na descuberta e tamén na difusión deste autor, do que pouco se sabía naquela altura, publicando datos biográficos, facendo pescudas sobre a súa vida e realizando actos de homenaxe. 

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios