O xurado dos Premios da Cultura Galega 2021 vén de seleccionar Bernardino Graña, Natalia Lamas, Zaza Ceballos, Antón Pulido e Nova Galega de Danza entre as galardoadas neste certame que ten como finalidade recoñecer a excelencia creativa, a capacidade de intercambio, a experimentación e a proxección da construción cultural na Galiza.
O académico, poeta, narrador e articulista foi recoñecido no apartado das "Letras". Docente até a súa xubilación, Graña colaborou con numerosas publicacións, faladoiros, prensa escrita, e foi impulsor do primeiro intento dun centro PEN Galiza en colaboración con Eduardo Branco Amor e Xosé Luís Méndez Ferrín, entre outros.
A pianista Natalia Lamas foi distinguida no ámbito da música polo valor da súa traxectoria de prestixio internacional. Ademais, preside a Asociación de Amigos da Ópera, considerada a entidade lírica máis antiga do Estado español nesta materia.
Na área do audiovisual, o xurado decantouse por Zaza Ceballos, produtora, escritora, directora cinematográfica e unha das pioneiras do audiovisual na Galiza. Directora e responsábel executiva de Zenith Televisión, Ceballos recibiu a Medalla Emilia Pardo Bazán 2021 polo seu labor centrado no recoñecemento á muller.
No que se refire ás artes plásticas', o galardón será para o pintor e gravador ourensán Antón Pulido, autor de mostras por todo o mundo (Xangai, Beijing, Seúl...). Este artista desenvolveu un papel como xestor cultural na Dirección Xeral de Cultura da Xunta a principios dos 90 e foi o primeiro director do Centro Galego de Arte Contemporánea (CGAC) en 1994.
Así mesmo, homenaxéase o papel de Nova Galega de Danza, unha entidade xurdida da man de Vicente Colomer e Jaime Pablo Díaz e destacada na fusión da tradición folclórica de raíz galega coa danza contemporánea, na sección de artes escénicas.
Os premios miran para o programa "Dígocho eu" da CRTVG á hora de outorgar o recoñecemento en lingua. O xurado decantouse por esta proposta pola "súa exitosa iniciativa de resolución de dúbidas sobre o idioma e empregando, ademais, unha linguaxe comunicativa moderna que conecta co público de todas as idades".
O galardón na modalidade de patrimonio cultural recae no Mosteiro de San Pedro de Rocas, probabelmente o conxunto cenobítico máis antigo da Galiza. Por último, o de proxeción exterior será para a Federación de Asociacións Galegas da República Arxentina (FSG).