Continúa na inspiración ecléctica e na solidez musical da súa primeira aposta, aquel Banda Crevisky que foi primeiro banda sonora, logo cd e despois sorprendeu nun directo vibrante a través do espectáculo “Universo Crevinsky” que recalou, entre outros no XXVI Festival Intercéltico de Ortigueira.
Desta volta o folk, o jazz, a música experimental ou mesmo o klezmer agroman a través dos doce temas no que os estilos se mesturan e rulan veloces para evocar a estética árabe, rusa ou mesmo punk. Dos temas cantados aos instrumentais, a evocación é a tónica coa que Jet Lag nos sorprende, pasando por múltiples universos nos que a Banda Crebisnky se move con comodidade.
Pablo Pérez continúa a estar detrás da composición das músicas, ao igual que na película dirixida por Enrique Otero, imprimindo un ritmo no que a mestura do tradicional cos sons contemporáneos conforman unha nova viaxe na que a metaforfose crebinskyana consigue, dalgunha maneira, provocar un jet lag pracenteiro. Talvez aí resida a identidade da banda, na mestura, no eclecticismo, no universo que se equipara a aquel de Kusturica con que tanto se emparentou. Unha aposta singular no panorama musical que toma forza en directos nos que a música se converte en enerxía compartida.
Banda Crebinsky presenta agora o seu Jet Lag mais en adianto botaron a andar polas redes o videoclip “Un piatto, dirixido por Enrique Otero, cunha desbordante ambientación que fai ás beiras ao surrealismo.