O sábado 28 de decembro ás 21.30 horas, Ataque Escampe presenta o seu novo EP, A alma, e dille “Adeus aos anos dez” —que titularon un dos seus discos— repasando algúns dos seus temas máis populares, mais “sorprendentemente anovados”, segundo anticiparon.
O concerto, para o que as entradas anticipadas están xa esgotadas, será no Guateque de inverno que organiza cada ano a Gentalha do Pichel, seguido das picadas de Wanda Buluba e Fragabuki. Quedan aínda arredor de 30 billetes para a venda no propio día, a partir das 21.30 horas.
O público do grupo parece ansioso por ver de novo a formación co vocalista orixinal, Álex Charlón, que anunciou o seu retorno este novembro após deixar os escenarios en 2015, tras a xira de presentación d'O disco vermello.
Aos tres membros habituais (o baixista Lois G. Carlín e os guitarristas Miguel Mosqueira e Samuel Solleiro), súmanse Cibrán Tenreiro na batería e Julio Vilariño Cabezas nos sintetizadores.
Ante a rápida venda das entradas na billeteira, Ataque Escampe xa prometeu nas redes sociais programar axiña máis datas.
![Fillas de Cassandra na gala aRi[t]mar 2023.](/asset/zoomcrop,480,270,center,center/media/nosdiario/images/2024/03/27/2024032717434116054.jpg)