Consideran que o 17 de maio ten de continuar o seu espírito festivo e reivindicativo e valoran que a decisión de declarar a Filgueira Valverde como autor homenaxeado no Día das Letras Galegas abre unha profunda fenda coas organizacións sociais que sempre mantiveron a festa. Son as razóns que impulsan a convocatoria, promovida fundamentalmente desde A Mesa pola Normalización Lingüística, e que xuntará esta quinta feira día 10 de xullo ás 18.30 horas na libraría Couceiro de Compostela (Praza de Cervantes) a entidades do mundo da cultura, da recuperación da memoria histórica, da defensa da lingua ou do ecoloxismo.
Fixar uns mínimos
O obxectivo da xuntanza é “fixar os mínimos comúns que unen a defensa da lingua e literatura galega e a partir de aí abrir as posibilidades para o Día das Letras Galegas non ser un ermo”, sinala Marcos Maceira, presidente da MNL que promove o encontro.
Na vontade está “manter vivo o día como data relevante, xa que a Academia deserta de facelo”, sinala Maceiras. En cada nova edición, competencia da Academia Galega é dar o nome da persoa á que se lle dedicará o Día das Letras Galegas, mais é a sociedade a través de asociacións, entidades ou centros de ensino quen organiza a multitude de actos que se desenvolven arredor da data. Desta volta, a designación de Filgueira Valverde anticipa un “divorcio” que pode ter repercusións cara ao futuro da conmemoración. O primeiro encontro que terá lugar en Compostela tentará sentar as bases dun acordo para promover unha festa social e colectiva para as letras e a cultura galega. Sábese xa que desde distintos colectivos, e mesmo a título particular, levaranse á xuntanza distintas iniciativas e propostas para poñer en común co fin de chegar a un acordo unánime.