Hai un ano, lembran as críticas e críticos, que Iñaki Martínez Antelo, director da institución, anunciou que deixaba o cargo. Hai uns días fíxoo efectivo. “Houbo tempo suficiente para que o Padroado do museo puidera facer unha convocatoria pública para o cargo seguindo códigos de transparencia e boas prácticas”, indican, “e á altura de hoxe, non hai ningunha convocatoria para cubrir o cargo”.
A asociación alerta tamén das “alarmantes declaracións públicas do responsable do Concello de Vigo” e demanda das “autoridades competentes” que o MARCO “continúe a ser profesional e independente, un espazo de investigación, documentación e formación de profesionais da arte e da cultura contemporáneas”
A Asociación Galega da Crítica, presidida por María Xesús Nogueira, é un colectivo de “críticas e críticos das artes visuais, da literatura, das artes escénicas, do cinema e da música”. O seu posicionamento público a respecto da situación do museo vigués vén engadirse a outros. Un dos últimos foi o da Asociación Galega de Profesionais da Xestión Cultural, enfocado nun sentido semellante.
