mércores 14/04/21

A asociación de Escritoras e Escritores en Lingua Galega conmemora o Día de Rosalía

A AELG realiza unha ofrenda floral e a lectura do seu manifesto anual no Panteón de Galegos Ilustres.
Ofrenda floral da AEGL realizada hoxe no Panteón dos Galegos Iluestres
Ofrenda floral da AELG realizada hoxe no Panteón de Galegos Ilustres. (Foto: AELG)

A Asociación de Escritoras e Escritores en Lingua Galega (AELG) conmemorou un ano máis o Día de Rosalía de Castro. A institución levou a cabo un acto no Panteón de Galegos Ilustres en Santiago de Compostela con aforo limitado, debido as restricións sanitarias, no que se realizou unha ofenda floral e a lectura do seu manifesto anual realizado por Anna R. Figueiredo.

Desde 2011 a AELG busca institucionalizar o Día de Rosalía de Castro como “unha xornada de celebración da nosa literatura, animando á cidadanía a agasallar cun libro en galego e cunha flor nese día”.

Tralo saúdo do presidente da institución, Cesáreo Sánchez Iglesias, leuse o manifesto feito por Figueiredo, no que se escoitaron frases como “(...) déixame ser que este mundo hoxe moito ten daquel Santiago do 53 co cólera nas rúas baleiras e as necesidades daquela volven nas almas, santa, volven e precisamos do teu falar”.

“Quen mira a obra de Rosalía entende a muller de vangarda que hai detrás dela, a insubmisa, a creadora do pensamento, a inconformista, a muller valente que elixe a palabra para loitar contra a inxustiza e para crear un país sublime. Ser Rosalía é ollar cara a unha nova normalidade na que só podemos avanzar”, concluía o manifesto.

Alén, levouse a cabo a lectura dunha serie de poemas de Rosalía de Castro nas voces de: Andrea Barreira Freije, Antía Yáñez Rodríguez, Arancha Nogueira, Jesús M. Calvo Rozas (Asociación Traxe Galego) ,María Carme Guitián (Asociación Traxe Galego), Miguel López Fariña (Agrupación Cultural e Musical Solfa), Pilar Reino Agrupación Cultural e Musical Solfa), Xerardo Rodríguez Roca (Agrupación Cultural e Musical Solfa) e Xosé Dios Diz Agrupación Cultural e Musical Solfa).

Esta iniciativa da AELG contou co apoio do Centro Español de Derechos Reprográficos (CEDRO) e a colaboración da Asociación Galega do Traxe e a Agrupación Cultural e Musical Solfa.

comentarios