luns 13.07.2020
Na sección "Un certain regard"

“O Que Arde”, de Óliver Laxe, competirá na selección oficial de Cannes

O director galego Óliver Laxe participará por terceira vez no Festival de Cannes. Farao na selección oficial da sección Un certain regard co seu novo filme, O que arde.

Un fotograma de "O que arde"
Un fotograma de "O que arde"

O certame de cinema de Cannes, un dos máis prestixiosos a nivel mundial, contará con presenza galega. E é que vén de seleccionar a programación do novo filme do galego Óliver Laxe, que competirá coa súa nova fita, O que arde, na sección Un certain regard. 

Non é a primeira vez que Laxe acode a Cannes. Xa fora premiado coas súas dúas anteriores longametraxes: Todos vós sodes capitáns, que recibiu o Fipresci da Quincena de Realizadores, e Mimosas, co Grand Prix da Semana da Crítica.

O que arde estrearase a finais de 2019 nas salas, coa distribución de Numax. A trama desenvólvese nos Ancares ao longo das catro estacións do ano e narra dúas historias en paralelo: a dun veciño que regresa á vila após saír do cárcere acusado de provocar un incendio e a de dous brigadistas que se comezan a traballar na loita contra os incendios.

Nun encontro organizado polo Festival Internacional de Cinema de Ourense (OUFF) co público, o director sinalou como principal responsábel dos incendios o abandono de rural e expresou o desexo de que a película sirva “como un xemido de orfandade deste mundo que morre”.

“O Que Arde”, de Óliver Laxe, competirá na selección oficial de Cannes
comentarios