O Arde Lucus celebrarase en 2022 entre os días 9 e 12 de xuño, segundo avanzou este sábado a alcaldesa de Lugo, Lara Méndez.
Na xornada de onte, unha recreación de tropas romanas atravesou a ponte romana sobre o río Miño para 'tomar' un ano máis a cidade amurallada. Este acto simbólico e unha ofrenda aos deuses, coa alcaldesa e a asociación Arde Lucus, serviu para presentar esta festa.
Na cita participaron tamén xornalistas dunha decena de países e tres continentes co obxectivo de divulgar a historia e o patrimonio da cidade.
A alcaldesa puxo en valor unha festa que conta coa colaboración de 19 asociacións da cidade. Segundo afirmou Méndez, trátase dun evento que "únenos como pobo e que preparamos con paixón, orgullo e do modo máis fidedigno e respectuoso cos nosos antepasados".
Volta após a Covid
A de 2022 podería ser o primeiro Arde Lucus sen restricións, aínda que todo vai depender da evolución da Covid.
Na deste ano, na que se celebrou a súa vixésima edición, contou cunha retransmisión da festa en liña. “Queremos que se afonde na consecución dese Arde Lucus internacional e en liña podemos chegar a calquera recuncho do mundo, a calquera fogar”, dicía entón a alcaldesa.
A recreación histórica que se fai no Arde Lucus está considerada Festa de Interese Turístico Galega e Festa de Interese Turístico Nacional.