luns 01.06.2020

Amplíase o período para a programación de espectáculos da Rede Cultural na Coruña

O BOP desta terza feira, 31 de marzo, publica as medidas para reactivar o sector cultural adoptadas pola Deputación, que se puxo en contacto coas asociacións profesionais para coordinar actuacións.

Xurxo Couto, no centro da imaxe, enviou unha carta ás asociacións profesionais (dacoruna.gal)
Xurxo Couto, no centro da imaxe, enviou unha carta ás asociacións profesionais (dacoruna.gal)

O Boletín Oficial Provincial da Coruña publica nesta terza feira, 31 de marzo, as primeiras medidas tomadas pola Deputación co fin de reactivar o sector cultural e que trasladou ás distintas asociacións profesionais para coordinar unha resposta conxunta.

"A área de Cultura da Deputación da Coruña está a promover a modificación de liñas de traballo para adaptalas á situación actual e novas iniciativas encamiñadas a paliar os efectos negativos que a COVID-19 vai ocasionar no mundo da cultura", sinalou o departamento que dirixe Xurxo Couto.

Entre estas accións, segundo recolle o BOP, destaca a flexibilización das bases da Rede Cultural, coa ampliación do prazo de programación por parte dos Concellos. Esta estenderase até o primeiro trimestre de 2021 "para así manter o orzamento e as actividades da edición anterior", explican desde a área de Cultura do organismo provincial.

Pagamentos pendentes

Xurxo Couto, nunha carta enviada ás asociacións profesionais, comunicou que a Deputación "dará prioridade á realización dos pagamentos pendentes, garantirá as programacións propias con axustes á situación sanitaria no calendario previsto, e prorrogará o prazo para o desenvolvemento e xustificación das actividades subvencionadas".

Ademais, mostrouse aberto á "achega de propostas" e anunciou que, unha vez se poida regresar á normalidade, impulsarase "unha campaña de apoio á cultura galega".

comentarios