A pouco de que o sábado ás doce da mañá comece o pleno do que sairá o substituto de Xosé Luís Méndez Ferrín na presidencia da RAG, os candidatos xa teñen pechadas as súas listas, completando as dúas vacantes que deixaran pendentes dun posíbel acordo. Margarita Ledo e Henrique Monteagudo toman parte da candidatura de Xesús Alonso Montero xunto a Rosario Álvarez e Andrés Torres Queiruga. Pola parte de Manuel González,canda os lingüistas Xosé Luis Regueira e Francisco Fernández Rei presentaranse con toda posibilidade Xosé Luis Axeitos, máis Dario Xohán Cabana.
A candidatura de Manuel González reforza a súa condición de herdeira da executiva anterior de incorporar Xosé Luís Axeitos, secretario e man dereita de Ferrín no seu tempo de presidencia da RAG, unha vez que na súa equipa concorre tamén Francisco Fernández Rei, membro asimesmo da dirección anterior. Canto a Xesús Alonso Montero, a súa candidatura inclúe a dúas das catro mulleres, que teñen cadeira en Tabernas, Rosario Álvarez e Margarita Ledo.
A poucas horas do pleno do que sairá o substituto de Ferrín, ningunha das candidaturas se atreve agoirar cal pode ser o desenlace da votación e quen se fará coa maioría dos 26 votos que decidirán o novo presidente da RAG.
