As pinturas ao fresco descubertas en 1991 na igrexa de San Vicenzo dos Vilares, en Guitiriz, contan con máis de 500 anos e son un valor único na Galiza pola súa singularidade, mais están en risco de desaparición debido ao seu avanzado deterioro.
Desde a Asociación Sociocultural Lareira de Soños dos Vilares chaman a atención sobre a falla de actuacións por parte das institución públicas que garantan mantemento dos frescos
Así o denuncian desde a Asociación Sociocultural Lareira de Soños dos Vilares, chamando a atención sobre a falla de actuacións por parte das institución públicas que garantan o seu mantemento.
Os frescos continúan a ser danados con rozaduras de bancos, humidades e outras causas ambientais “até tal punto que teñen sido incluídos pola súa importancia e pésima conservación nas listas vermellas do patrimonio na Galiza e no Estado”, sinalan desde a asociación.
Estas pinturas representan a Lamentación sobre Cristo Morto, o apóstolo Santiago e elementos paisaxísticos e xeométricos comúns a outras pinturas ao fresco na Galiza, unha delas, a Imposición da Casulla a San Ildefonso, é única no país.
Desde Asociación Sociocultural Lareira de Soños dos Vilares lembran nun comunicado aos novos gobernos da Deputación de Lugo e do concello de Guitiriz a existencia dun acordo do ano 2017 que fica aínda sen cumprir e que emanou da comisión de Cultura do Parlamento Galego para restaurar as pinturas murais do século XVI que alberga Guitiriz.
O acordo emprazaba a que conxuntamente se acordase a fórmula definitiva para a restauración entre a Xunta, a deputación, o concello de Guitiriz e a diócese de Modoñedo-Ferrol.
O acordo emprazaba a que conxuntamente se acordase a fórmula definitiva para a restauración
Desta maneira, a Lareira solicitou xa unha nova xuntanza coa alcaldesa de Guitiriz, Marisol Morandeira, e coas novas persoas responsábeis da área de Cultura da Deputación de Lugo co fin de recuperar “tan importantes pinturas e sacalas da lista vermella do patrimonio do Estado na que ten entrado para vergoña das institucións a pesar dos anos de demanda de solución por parte da nosa asociación”, reivindican desde A Lareira de Soños.
Sinalan ademais desde esta entidade sociocultural que o proxecto xa foi redactado por encargo da Xunta de Galiza e, por tanto, a contratación dos traballos “depende unicamente de decisións políticas”, segundo sinalan, polo que aseguran que seguirán a insistir “dado o perigo de desaparición definitiva dos mesmos se non se actúa para frear o seu paulatino deterioro”.
Desde a asociación teñen apuntado ademais que a restauración dos frescos suporía ademais da recuperación dun tesouro patrimonial, unha importante inxección económica e outro atractivo turístico e cultural na Chaira.