Por vez primeira reducido a unha única xornada por motivos de carácter orzamentario, o XI Simposio anual O libro e a lectura afondará na relación dos sector e a produción literaria cos medios de comunicación. O programa, que se desenvolverá o vindeiro día 20 de novembro no auditorio do Consello da Cultura Galega, achegará ao debate as experiencias de catorce profesionais do xornalismo en distintos soportes.
O director do portal culturagalega.org, Manuel Gago, o decano do Colexio de Xornalistas, Xosé Manuel Pereiro e o xornalista cultural Camilo Franco abrirán a xornada na sesión de mañá participando na mesa “A cultura nos medios. O caso galego”. A rede será o tema da segunda das sesións, con xornalistas que desenvolven o seu traballo na rede a través de blogs e webs. Montse Dopico do Magacine cultural galego, César Lorenzo Gil, de Biosbardia, Manuel Rodríguez Alonso, do blog Bouvard e Pechuchet, Raquel C. Pico de Disquecool e Nacho Alonso de Fervenzas Literarias intervirán na mesa máis numerosa da xornada.
Radio, prensa e televisión
Radio, televisión e xornais ocuparán as dúas mesas redondas da tarde. Na primeira, tres profesionais da radio darán a súa visión das posibilidades do seu medio para a comunicación da produción editorial e literaria e o papel na animación á lectura. Serán Ana Romaní do Diario Cultural da Radio Galega, Henrique Sanfiz de Radio Fene e Kiko Novoa de Galicia por diante da Radio Galega.
Para rematar, o simposio mergullarase nas páxinas de xornais con Santiago Jaureguizar de El Progreso, Xesús Fraga de La Voz de Galicia e Carme Vidal de Sermos Galiza.
