A Asociación de Escritoras e Escritores en Lingua Galega (AELG) conmemora, un ano máis, o Día de Rosalía de Castro, que a partir deste ano será o 23 de febreiro. acto prinicpal tivérono en Compostela o pasado sábado mais para esta semana promoven, a través da súa base asociativa, outras actividades en diversas cidades e vilas do país.
Todos poden consultarse, actualizados, a través da súa propia páxina web.
Tamén se poden atopar na páxina as propostas de actividades da AELG para os centros de ensino galegos, así como a listaxe de concellos e institucións que aprobaron en pleno a celebración do Día de Rosalía. Ademais, tamén está dispoñíbel o manifesto para esta celebración, obra este ano da escritora Beatriz Maceda Abeleira.
Proposta presentada no Parlamento galego
Neste 2022, alén de todas estas propostas, a AELG dirixiuse ao Parlamento galego para, segundo explican nun comunicado, "propoñer a súa participación activa na difusión e recoñecemento da obra e a figura fundadora de Rosalía de Castro, en especial para as xeracións máis novas que colectivamente contribuímos a coeducar".
Para esta asociación, "a súa palabra feita poesía ou prosa reflexiva" é un dos "procedementos máis eficaces para fomentar o amor á nosa lingua e comprender a nosa identidade cultural".
Por este motivo piden ao Parlamento que emprenda e apoie "a realización de actividades de promoción da obra da nosa escritora que impliquen ao conxunto do pobo galego".
Esta entidade busca, desde 2011, institucionalizar ese Día de Rosalía de Castro como unha xornada de celebración da literatura galega e animan á cidadanía "a agasallar cun libro en galego e cunha flor" durante a xornada deste 23 de febreiro.
