Agardabas por un novo número? Pois xa non queda nada para que poidas gozar de Sermos Galiza, que esta semana proponche descubrir mellor quen é Luma Gómez, unha das grandes damas do teatro do país. Aliás, poderás saber máis sobre patrimonio e historia.
Nunha conversa con Manuel Xestoso, Gómez achega a súa opinión sobre diversos temas coma o momento actual do teatro galego, a creación independente, a evolución deste arte, os inicios afastados do ámbito profesional...
Baixo o título ‘Luma Gómez. A loita polo teatro’ e cunha imaxe de Teatro del Noroeste, a artista da conta da súa traxectoria, esa que a levou a recibir o Premio de Honra da Fundación Aisge.
Dunha reitoral a un castro
Ademais de para o patrimonio artístico, o semanario tamén garda espazo para o patrimonio histórico. Así, o xornalista Antón Escuredo presenta a historia ‘Reitoral de Paraños. O soño veciñal dun fogar social que agora é hotel’.
Na reportaxe alude ao Caso Retablo, á corrupción na igrexa católica e a unha loita veciñal en Covelo que quedou tapada polos escándalos.
Pola súa banda, Yolanda Álvarez e Luís Francisco López investigan sobre ‘O castro de Castromaior’, en Portomarín, á marxe dereita do Miño. O texto e as imaxes axudan a invitar á visita.
E falando de visitas, poderás ir con Adela Leiro, Mon Daporta e Xan Colazo -membros do Colectivo Xea- ‘Camiñando desde Armenteira a Escusa’.
Gozar da literatura e do cinema
Como cada sábado, tampouco faltarán á súa cita contigo as recomendacións literarias, musicais e cinematográficas. Na área de libros, Mario Regueira e Manuel Barreiro falan de Papiroflexia de Fernando Castro e Little Nemo descobre os Beatles/Rolling de Daniel Llabrés e Jaime Pantoja.
Así mesmo, no apartado reservado para a música Olga Brañas analiza o disco Zapatilla de The Turre’s Band e Fernando Montenegro asina o artigo ‘Enrique X. Macías na lembranza’. Na escolma de cine, Andrés Castro destaca ‘Devolvendo o golpe’, un traballo do cineasta galego Carlos Prado Pampín.
A modo de extra, neste número fornecemos un artigo de deseño de Pepe Barro que leva por título ‘Os xentís anduriñas’ e unha achega de arquitectura (‘Pero iso que é?’) de Lázaro Armental. Fechan os contidos os pasatempos de Xerardo R. Roca e Xoán Costa.
Para ter toda esta oferta na túa man só tes que acudir ao quiosque ou á nosa tenda en liña este sábado para mercar o Sermos Galiza que acompaña Nós Diario. Aínda que tamén podes facer nun momento a túa subscrición!
