Abril, mes de libros

Entramos en abril. Mes que o foi de cravos en rebeldía popular e militar en Portugal. Mes de liberación. E referido a nós, participamos na celebración do libro galego en especial. No día 2, internacionalmente (somos nación), para o libro infantoxuvenil, o que tamén poden ler nenas e nenos, e logo, o 23, día mundial para o libro en xeral. Abril é mes de libros para todo o ano e para días cheos de lecturas. De primeiras, centrarémonos no libro como reflectir de creación. Un soporte atraente, dixital ou non, que tamén podemos (e debemos) tocar coa mirada e que sintetiza a expresión da creativa, que chama á complicidade das e dos lectores para a lectura. Libro de varios formatos e redes, que tamén pode ser dixital, habitante de discos duros, deixándose ir polos recorta e pega, polas descargas, facéndose camiñar de traxectos certos e/ou incertos ou insospeitados. A dicotomía entre lectura "carnal e virtual" O libro xa ten outras extensións e outros marcos referentes. Autoras e autores explican que á lectura "carnal e a virtual" non se opoñen. A cousa non pode moverse entre nostalxia e descoñecemento. O soporte xa importa menos. Nun e/ou outro modelo, o ben escrito vai á misa. Logo, coma sempre, hai o regular e tamén o mal. A cualidade vai no escribir e no ler ben, si, en diálogos intelixentes (intelectuais) entre escritor(a)nauta e lector(a)nauta. A cualidade vai no escribir e no ler ben, en diálogos intelixentes entre escritor e lector Sobre todo, porque se quere, peta e gusta, para embocar en conquistas que impliquen emocións, cariños, namoramentos e desexos de propiedade, pois os libros, de calquera modelo que for, tamén se mercan para posuílos e relelos vai saber cantas veces. Ata para falar con eles e logo, ao ter que marchar, despedirse deles. Tamén para agasallar ou prestar (pero isto, o segundo, a poder ser, con volta, pois un pode quedar moi namorado do libro pola súa lectura, pero non xustifica facerse a do tolo e non volvelo). Escribir, editar e ler Custa desprenderse dun libro a contido de marabilla e a frescura de cultura. Que lindo miralo e dicirlle: léote, léome e lémonos, pois vai de certo canta boa parte da nosa vida se move co que lemos nun libro (damos por feito, sen negar nada, a importancia e significación de que o libro sexa orixinal galego en galego, sen emporiso deixar á marxe outras linguas, así como a valoración das traducións á nosa lingua para o noso enriquecemento cultural). Velaí un trío bonito arredor do libro e da lectura: escribir, editar e ler, pois no libro intúese e percíbese, nótase e valórase; pola lectura e comunicación, como se ideou, como se escribiu, editou e valorou, como se animou e animará, para que chegue a nós, lectoras e lectores, e lelo con sumo gusto e non por consumo simplemente, pois o libro posibilita e convida a vivencias e experiencias. Move, promove e remove actitudes e condutas no exercicio intelixente dos pensamentos. No libro recoñecemos, gustamos por sabor e saber, os horizontes de creación pasando polo diverso, desde a literatura, a filosofía, o ensaio, a historia e as tradicións, a antropoloxía, a psicoloxía, a política, o humor, a crítica, o cine e o teatro, a música, as biografías e conversas, etcétera. Amor polos libros Escritores e escritoras, lectoras e lectores e máis intervintes (que non deben interferir) en especial animadoras e animadores (familia e institucións), mediadoras e mediadores, xente de bibliotecas e librerías, todas e máis, incidirán na converxencia no nuclear importante: o libro como soporte de lecturas. Todas e todos, cadaquén coas súas imaxinacións como función social, postas e postos en ánimos e gustos, responsabilidades e medios, así en suma, nos proxectos lectores e nos traxectos cos (e nos) libros no idioma noso, participarán no activo con importancia e necesidade. Que secuencias serán logo as de imaxes sentidas, paisaxes de belezas, promovidas e movidas, a pasos de avanzar, polas lecturas e polos libros nas frescuras da nosa cultura. Cultura que é pregunta constante que se acende con tantas outras cada día. Preguntas necesarias Hai moitos libros, como din en Portugal, "na livralhada" circulante, que nos afectan. Hai libros de terror, pero terror polos libros? Hai libros de medo, pero medo polos libros? Hai libros de espanto, pero espanto polos libros? Tamén hai libros de sabor e sabor polos libros. Hai libros de gusto e gusto polos libros. Hai libros de amor e amor polos libros. Hai anos dicíase cando se ía a luz: "Parou a forza". Pois non, que non paren as forzas. Son tempos de soñar na luz coas belezas dos libros nas lecturas. Feliz abril, mes de libros.