O Festival SonRias Baixas, que se celebrará os días 4, 5 e 6 de agosto, comezará a encher mañá quinta feira Bueu de música e festivaleiros coa súa tradicional Festa de Benvida (de balde) que, esta vez, terá lugar dentro do propio recinto do festival. A música dá conta da única banda tributo a Ska-P Gato López e a organización avanza que ‘o público poderá ver sobre o escenario a algúns dos membros de Ska-P ’ acompañando a Gato López durante o concerto.
Na sexta o protagonismo será para os cataláns La Gran Pegatina (a versión ampliada de La Pegatina), os barbanzáns Heredeiros da Crus, a mítica formación punk Lendakaris Muertos, a banda catalana de electrónica La Sra. Tomasa e os coruñeses Chotokoeu, que xa levan 10 anos de andar polo mundo coa súa mestura de balkan, rock, swing…
Na noite do sábado subirán ao escenario os uruguaios La Vela Puerca, e dous clásicos do rock estatal: Soziedad Alkoholika e Boikot; ademais dos navarros Vendetta (ska), o punk-folk dos galegos The Skarnivals, o blues de Gold&Colt e o colectivo “arterrorístico” Poetarras.