venres 29.05.2020

Abandono definitivo da dirección do festival de cinema de Ourense

A través dun comunicado Fran Gayo e Analía Alonso dan por acabada a súa etapa no OUFF ao non ter, a catro meses do inicio do evento, unha proposta firme e formal que garanta poder realizar un certame nas condicións que entenden necesarias.

O alcalde de Ourense, Jesús Vázquez (dereita), e o director do festival, Fran Gayo, na edición de 2017. Foto: Festival de Ourense.
O alcalde de Ourense, Jesús Vázquez (dereita), e o director do festival, Fran Gayo, na edición de 2017. Foto: Festival de Ourense.

Fran Gayo e Analía G. Alonso, encargados da dirección do Festival de cinema de Ourense desde 2016, déixano. Unha decisión que fan pública a través dun comunicado no que falan de decisión “triste e difícil” mais tamén “irrevocábel”. “Sentimos que non fica máis saída”, afirman, indicando que a catro meses do comezo de OUFF2018 non teñen una proposta “formal e firme” que garabnta a realización dun evento tan importante.

Gayo e Alonso tomaron o mando do certame en 2016. Efectuaron un xiro na súa programación e dimensión, que consolidou en 2017. En febreiro deste ano, o equipo presentou a súa renuncia. A razón, a demora nos pagamentos por parte da Administración local a provedores, membros do festival e mesmo aos filmes premiados. “Non foi un feito illado, senón que se engadía a unha serie de situacións moi graves, alleas ao equipo do festival, que se deron durante os prepartivos da 22ª edición”, sinalaban naquela altura, “e que causaron a caída de varios patrocinadores interesados”.

O mundo do cinema apoiou a continuidade de Gayo no festival de Ourense. “Ante a situación en que se atopa o Festival de Ourense e a raíz dos últimos acontecementos, os abaixo asinantes queremos expresar o noso total apoio á xestión do equipo artístico de Gayo como director artístico e de Alonso como produtora xeral”, comeza o documento. Entre os asinantes, primeiras figuras do cinema galego recente como Óliver Laxe, Andrés Goteira, Alfonso Zarauza, Anxos Fazáns, Xacio Baños, Diana Toucedo ou Lois Patiño.

Abandono definitivo da dirección do festival de cinema de Ourense
comentarios