Folións de Viana, de Buxán (O Bolo) ou da Mourela p'acá de Manzaneda, máscaras como o Touro ou o Xigante de Celanvente, as Pantallas de Xinzo, os Cigarróns de Verín, os Vergalleiros de Sarreus, os Felos de Maceda, as Bonitas de Sande, os Troiteiros de Bande ou os Peliqueiros e Parranfóns de Campobecerros. Un abigarrado e multicor desfile -mais unha vez o faiscante entroido galego- encheu de vida esta fin de semana as rúas de Viana do Bolo e Vilariño de Conso nun dos eventos etnográficos de maior potencia iconográfica de todos cantos se desenvolven no país.
Na Mascarada Ibérica déronse cita até 40 festas de inverno -celebracións pagás do cambio das estacións- da península ibérica -cántabras, zamoranas...-, con representación tamén portuguesa: os Caretos de Lazarim e Parada, o Careto de Valverde, o Chocalheiro de Bemposta ou os Velhos de Bruços.
Organizou o evento -o pórtico do entroido que xa dará comezo a próxima semana en Xinzo para logo se estender ao conxunto do país- a Comisión do Entroido 2018 de Viana do Bolo, a Asociación Xuntos polo Folión de Vilariño de Conso e a Saga, en colaboración coa Asociación de Mulleres Rurais de Viana.
