As Silenciadas foi convidada a participar no Festival Internacional de cine Documental online Humanity Explored que está en marcha na rede con diversas categorías a concurso, entre elas, o documental máis visto e máis votado. Para participar na votación e apoiar o filme cómpre premer nesta ligazón http://www.cultureunplugged.com/documentary/watch-online/play/11292/As-Silenciadas.
Dirixido por Pablo Ces, o documental conta co guión de Aurora Marco e o propio Pablo Ces. Recupera a historia, a imaxe a a voz de mulleres ás que Aurora Marco se achegou para recoller tamén no libro Mulleres na guerrilla antifranquista galega (Laiovento).
As silenciadas é un documental histórico que ten como protagonistas ás mulleres que estiveron na clandestinidade e participaron do movemento guerrilleiro. Sufriron represión en forma de morte, cárcere, tortura ou exilio e desenvolveron un labor fundamental na oposición ao franquismo. O documental recolle testemuños únicos das participantes na guerrilla e visita os espazos nos que se desenvolveu a súa resistencia.
