venres 14/08/20
UN DIXITAL EN CLARO ASCENSO DE AUDIENCIA

SermosGaliza.Gal estrea deseño

Semana de mudanzas en Sermos. Non só muda de pel o semanario: o diario dixital tamén estrea novo deseño. Será esta cuarta feira, en pleno momento de crecimento de audiencia. En 2015, Sermos consolidou a súa posición de lideranza en páxinas vistas (5,4 millóns) e nas redes sociais, sendo o único meio dixital que supera os 30 mil seguidoras e seguidores.

Páxina de proba do novo Sermos
Páxina de proba do novo Sermos

Un diario dixital máis cómodo de ler, coa información mellor organizada e coa adaptación de deseño responsive para todo tipo de pantallas, desde os computadores até as tabletas e os telefones móveis. Así se vai apresentar SermosGaliza.Gal a partir desta cuarta feira 3 de Febreiro. Vaino facer despois de completar un ano 2015 de consolidación e crecimento. Sermos continúa a ser o diario dixital líder en número de páxinas vistas (con 5,4 millóns) e incrementou nun 22,7% o número de usuarias/os únicas/os, ao totalizar 613.506. Nas redes sociais Sermos é con moito o dixital líder no Facebook, con 18.001 amigas e amigos. No conxunto das redes é o único entre os meios redixidos en galego que supera a barreira das 30.000 persoas seguidoras, en concreto alcanza xa a cifra de 33.266.

Nas redes sociais Sermos é con moito o dixital líder no Facebook, con 18.001 amigas e amigos

"O que tencionei facer co novo deseño é estruturar mellor a información e facer a vida máis cómoda ás persoas leitoras, que achen antes as cousas e que vexan antes o que Sermos xulga máis relevante", explícanos Miguel Suárez, ourensán de 40 anos recén feitos e autor da nova maqueta do Sermos. "Categorizar a información. Facer a leitura máis áxil, menos monótona, identificar máis rápido os titulares, o que é importante. Eses eran os retos", afirma este integrante da plataforma Opennemas.

A tipografía eleita para o traballo é unha bitter. "É limpa, lexíbel a calquer tamaño que a poñas, cómoda de ler. Todo está pensado para que funcione nos diferentes aparatos e nos distintos tipos de pantalla. Os tipos, os interlineados...", relata.

"Facer a leitura máis áxil, menos monótona, identificar máis rápido os titulares, o que é importante. Eses eran os retos", afirma Miguel Suárez, o autor do novo deseño

O novo Sermos é máis ancho. Pasa dunha amplitude de 960 píxeles, ríxida ás mudanzas, a un ancho de 1.280 adaptábel ao ser deseño responsive a todo tipo de pantallas.

Muda tamén a cabeceira. Sermos Galiza aparece cunha letra máis miúda, na parte superior esquerda da páxina. Sermos en branco, non en negro. "A proposta era apañar as cores corporativas e darlle personalidade", explica Suárez. E enfatiza que, embora encolla o tamaño, a marca destaca máis. "Eu sempre explico que non sempre é cuestión de tamaño, senón de procurar o equilibrio, que a cabeceira respire, xogar coas marxes, que non fique encaixonada", ilustra este deseñador de xa longo currículo profesional, con incursións en todos os campos do deseño gráfico, desde a infografía até o 3D pasando pola imprensa e, por suposto, o mundo dixital.

comentarios