Após escoitar as partes o xuíz decidiu abrir un procedemento ordinario que culminará o vindeiro 4 de febreiro.
Xurxo, activista da Asemblea aberta de Coia enfronta unha acusación de 3 anos de cadea por un suposto delito de "atentado á autoridade" e "agresións".
Este veciño vigués foi detido na xornada de onte (7 de xaneiro) cando se atopaba na rotonda de Coia xunto unha ducia de activistas máis. Segundo o informe policial Xurxo tería agredido supostamente a un axente polo que foi prendido e levado a comisaría. Após ser posto en liberdade con cargos notificóuselle a abertura dun xuízo rápido.
Segundo puido saber Sermos Galiza a Fiscalía pide 3 anos de cadea para Xurxo. Pola súa banda, a defensa demandou a abertura dun xuízo ordinario, como finalmente resultou, para garantir o dereito á lexítima defensa e achegar probas e testemuños que corroboren a versión do acusado.