Un xantar para ficar apaixonado

Sashimi de salmón O sashimi é unha exquisitez xaponesa, unha das elaboracións que forman parte do sushi. Pode ser de peixe ou marisco e hoxe imos probar o de salmón. Ingredientes (2 persoas): 100 g lombo de salmón, mollo de soia, sementes de sésamo. Elaboración: Para comer o peixe sen cociñar evitando problemas imos precisar salmón xa conxelado, ou no caso de ser fresco conxelalo máis de 48 horas antes. Sacámolo do conxelador un pouco antes de preparalo e aproveitaremos que está algo conxelado para cortalo máis facilmente. Cun coitelo ben afiado cortamos lascas en dirección contraria á veta, rectangulares e finas, arredor de medio centímetro de grosor máis ou menos. Servimos nun prato colocadas unhas sobre outras con sementes de sésamo por enriba e acompañadas con mollo de soia, para mollar no momento de comer. Escalopiños de tenreira con mollo de queixo azul galego Os escalopiños de tenreira son moi tenros e saborosos e combinan a perfección co sabor intenso do queixo azul. Ingredientes (2 persoas): 8 escalopiños de tenreira, 200 ml de nata para cociñar, 125 g de champiñóns laminados, 100 g de queixo azul, fariña de trigo, 2 allos, 1/4 vaso de viño branco. Elaboración: Preparamos os escalopiños retirando partes de graxa se as tiveran e golpeámolos suavemente para aplanalos. Salpementamos os filetes e pasámolos polos dous lados por un prato con fariña. Despois fritímolos nunha tixola cun chisco de aceite, e aos poucos minutos, cando estean ao punto, retirámolos e reservamos. A continuación pelamos os allos, cortámolos finiños e dourámolos cun chisco de aceite na mesma tixola, logo engadimos os champiñóns e refógamolos un anaco. Engadimos o viño e deixamos a fogo medio. Cando estean cociñados os champiñóns e o viño teña reducido, engadimos a nata e o queixo cortado en anacos. Integramos todo ben cando se derreta o queixo e deixamos uns minutos máis para que se cociñe a nata e espese. Engadimos os escalopiños á tixola coa nata para darlles un golpe de calor e finalmente, servimos nun prato a carne co mollo por enriba. Podemos acompañar tamén con cacheliños con monda. Mousse de maracuxá Rematamos o xantar cunha mousse que vos vai apaixonar, ten un toque acedo e unha textura moi suave. Ingredientes (2 persoas): 100 ml de nata para bater, 1 ovo, 25 g de azucre, 1 folla de xelatina, 3 maracuxás maduros Elaboración: Abrimos dous maracuxás pola metade e tirámoslles a polpa e as sementes cunha culler. Trituramos todo ben cun batedor, e pasamos por un coador para quitar os anacos de semente triturada. Poñemos nun cunco con auga fría a folla de xelatina e deixamos hidratando 10 minutos. Mentres tanto imos montando a nata co azucre cun batedor de globo, comezando a baixa potencia e subindo pouco a pouco até que se debuxen sucos na nata, reservamos. Separamos a clara da xema do ovo e noutro cunco á parte montamos a clara co batedor de globo, e ao igual que a nata, comezamos a baixa potencia e imos subindo. Incorporamos as claras batidas á nata con movementos envolventes. Cando teñamos hidratada a xelatina, botámola xunto ao zume de maracuxá nun cazo a fogo baixo, e remexemos constantemente até que a xelatina se disolva completamente. Retiramos do lume, agardamos a que arrefríe un pouco e incorporámola á nata, remexendo tamén con movementos envolventes. Botamos en vasiños de chato e deixamos na neveira 4 horas para que colla consistencia. Ante de servir abrimos o outro maracuxá, tirámoslle a polpa cunha culler, remexémola ben para que se separe e botámola sobre a mousse.